Elimizde áleýmettik tólemder men densaýlyq saqtaý taqyrybynda feıkter jıi taralady

Spıkerdiń aıtýynsha, feık taratýshylar halyqtyń nazaryn kóp aýdaratyn taqyryptardy paıdalanady.

– Eń kóp burmalanatyn taqyryptardyń qatarynda áleýmettik tólemder, densaýlyq saqtaý, qarjy jáne qaýipsizdik bar. Sáıkesinshe, osy salalarǵa jaýapty Eńbek jáne halyqty áleýmettik qorǵaý mınıstrligi, Densaýlyq saqtaý mınıstrligi, Іshki ister mınıstrligi, Qorǵanys mınıstrligi jáne Energetıka mınıstrligi jalǵan aqparattyń nysanasyna jıi aınalady. Óıtkeni dál osy máseleler qoǵam úshin mańyzdy. Sondyqtan jalǵan aqparat taratýshylar da adamdardyń emotsııasyna áser etetin osyndaı taqyryptardy qoldanady, – dedi ortalyq basshysy.

Onyń aıtýynsha, mundaı jalǵan aqparat mátindik habarlama túrinde ǵana emes, jasandy ıntellekt kómegimen daıyndalǵan dıpfeıkter, qoldan jasalǵan daýystyq habarlamalar jáne messendjerler arqyly taralatyn aýdıojazbalar túrinde de kezdesedi.

Rýslan Bekarslanov mundaı jaǵdaıda resmı aqparatty ýaqytyly jarııalaý sheshýshi ról atqaratynyn aıtty.

– Ár memlekettik organ óz quzyretindegi aqparatty birinshi bolyp jarııalaýy kerek. Óıtkeni eshkim sol vedomstvonyń ózinen artyq ári jedel aqparat bere almaıdy. Eger resmı túsindirme keshikse, onyń ornyn qaýeset pen túrli joramal basady, – dedi ol.

Ortalyq basshysy jalǵan aqparatpen kúreste ony joqqa shyǵarýmen ǵana shektelmeı, halyqqa túsindirý jumystaryn aldyn ala júrgizýdiń mańyzy zor ekenin atap ótti. Onyń aıtýynsha, resmı aqparat neǵurlym jyldam jarııalansa, jalǵan aqparattyń keń taralý múmkindigi soǵurlym azaıady.

Buǵan deıin saıasattanýshy Ǵazız Ábishev feıkterge qarsy turý úshin qoǵamnyń aqparattyq ımmýnıtetin kúsheıtý kerek ekenin aıtqan edi.