Elimizde áleýmettik kómek alatyn otbasylar sany 41,3 myńǵa deıin azaıdy
ASTANA. KAZINFORM- Qazaqstanda áleýmettik qamsyzdandyrý júıesimen qamtylǵan halyqtyń úlesin kórsetetin Ornyqty damý maqsattary (ODM) ındıkatory boıynsha oń dınamıka baıqalady. Eger 2025 jyldyń qorytyndysynda áleýmettik kómek alýshylar sany 54,4 myń otbasy bolsa, qazirgi ýaqytta bul kórsetkish 41,3 myń otbasyna deıin azaıǵan. Bul másele Úkimette ótken Ornyqty damý maqsattary jónindegi Úılestirý keńesiniń XI otyrysynda qaraldy.
Premer-mınıstrdiń orynbasary – ulttyq ekonomıka mınıstri Serik Jumanǵarınniń tóraǵalyǵymen ótken jıynǵa BUU ókilderi, ortalyq memlekettik organdar men oblys ákimdikteriniń basshylary qatysty.
Kezdesýdi asha otyryp, Serik Jumanǵarın Qazaqstannyń jahandyq ornyqty damý kún tártibine joǵary beıildilik tanytyp, Ortalyq Azııadaǵy kóshbasshy mártebesin bekitkenin jáne halyqaralyq qoǵamdastyqtaǵy pozıtsııasyn nyǵaıtqanyn atap ótti.
-Memleket basshysy Qasym-Jomart Toqaev áldeneshe ret nazar aýdarǵandaı, ODM-ny júzege asyrý bizdiń ulttyq basymdyqtarymyzben tikeleı baılanysty. Prezıdent BUU Bas Assambleıasynyń 80-shi sessııasynda sóılegen sózinde Qazaqstan ornyqty damý mindetterin memlekettik josparlaý men bıýdjetti qalyptastyrýǵa biriktirgenin atap ótti. Osy baǵdarlarǵa qol jetkizýde biz halyqaralyq uıymdarmen yntymaqtastyqty nyǵaıtýǵa erekshe mán beremiz, – dedi vıtse-premer.
BUU-nyń Qazaqstandaǵy Turaqty úılestirýshisi Sarango Radnaaragcha ODM boıynsha jyl saıynǵy ulttyq esepti daıyndaýdyń, bıýdjettik josparlaýdy ornyqty damý mindetterimen baılanystyrýdyń jáne óńirlik yntymaqtastyqty nyǵaıtýdyń mańyzdylyǵyn atap ótti. Sondaı-aq klımattyń ózgerýi jáne sý resýrstaryn basqarý máselelerindegi Qazaqstan men BUU-nyń birlesken jumysyna nazar aýdardy.
BUU Damý baǵdarlamasynyń (BUUDB) Qazaqstandaǵy Turaqty ókili Katarjına Vavernıa elimizde ODM-dy memlekettik josparlaý júıesine engizý baǵytynda ilgerileýshilik baryn aıtty. Onyń pikirinshe, kelesi mańyzdy qadam – ulttyq basymdyqtardy ár óńirdiń ereksheligine beıimdeý, jergilikti ózin-ózi basqarýdy damytý jáne aýmaqtardyń ekonomıkalyq áleýetin ashý.
Ol Eýropalyq Odaqtyń qoldaýymen jergilikti ózin-ózi basqarý reformasyna járdemdesýge arnalǵan úsh jyldyq bastama iske qosylǵanyn habarlady. Joba Ulttyq ekonomıka mınıstrligimen jáne jergilikti atqarýshy organdarmen birlesip, Abaı, Jetisý, Túrkistan, Mańǵystaý jáne Qostanaı oblystarynda júzege asyrylady. Bastama jergilikti ekonomıkany yntalandyrýǵa, óńirlerdiń áleýetin nyǵaıtýǵa, jumyspen qamtýdy keńeıtýge jáne halyqtyń tabysyn arttyrýǵa baǵyttalǵan.
Otyrys barysynda qatysýshylar ODM-ǵa qol jetkizýdiń aralyq kórsetkishterin qarastyryp, aldaǵy perspektıvalardy talqylady.
Óńirlerdegi nátıjelerdiń qatarynda Qyzylorda oblysyndaǵy ınklıýzıvti bilim berý kórsetkishteri de ataldy. Munda ınklıýzıvti bilim berýge jaǵdaı jasalǵan mektepterdiń úlesi 99,3%-ǵa jetken. Sonymen qatar úsh aýysymdy jáne apattyq mektepter máselesi tolyq sheshilgen.
Jetisý oblysynda gazdandyrý jumystary aıasynda Kerbulaq aýdanynan Taldyqorǵan qalasynyń mańyndaǵy aımaqqa deıingi 110 eldi meken gazben qamtamasyz etildi. 2022 jyly gazben qamtylǵan eldi mekender sany nebári beseý bolǵan. Qazirgi ýaqytta oblysty gazdandyrý deńgeıi 67,2%-ǵa jetip, 467 myń adam gazben qamtylǵan. Bıyl taǵy 16 eldi mekendi gazdandyrý josparlanyp otyr. Nátıjesinde oblysty gazdandyrý deńgeıi 72%-ǵa jetýge tıis.
Aldaǵy baǵyttardyń biri – Ornyqty damý maqsattarynyń iske asyrylýyn turaqty monıtorıngteý men baǵalaýdyń tutas ulttyq júıesin qalyptastyrý. Bul rette ındıkatorlardy jergilikti deńgeıge beıimdeý jumysy jalǵastyrylady.
Osyǵan deıin Qazaqstannyń damý kórsetkishi boıynsha Ortalyq Azııada kósh bastaǵany týraly jazdyq.
