Elimizde áleýmettik qyzmetkerlerdiń biliktiligin taný tetigi engizildi

ASTANA. KAZINFORM — Qazaqstanda áleýmettik qorǵaý júıesin jańǵyrtý aıasynda áleýmettik qyzmetkerlerdiń kásibı biliktiligin taný tetigi engizilip otyr. Bul týraly Eńbek jáne halyqty áleýmettik qorǵaý mınıstrligi habarlady.

Bıyldan bastap arnaıy áleýmettik qyzmet kórsetetin uıymdardy lıtsenzııalaý kezinde biliktilikti taný týraly sertıfıkattyń bolýy mindetti shartqa aınaldy.
Mınıstrliktiń málimetinshe, búginde 1 641 maman biliktilikti taný rásiminen sátti ótti. Sertıfıkattalǵan áleýmettik qyzmetkerlerdiń eń kóp sany Batys Qazaqstan (362) jáne Shyǵys Qazaqstan (355) oblysynda tirkelip otyr.

Qazir elimizde jalpy 12,2 myńnan astam áleýmettik qyzmetker jumys isteıdi, olardyń 6,7 myńnan astamy aýyldyq jerlerde eńbek etip jatyr. Mamandardyń basym bóligi úıde qyzmet kórsetýge tartylǵan (86,4%). 

Qyzmet sapasyn arttyrý jáne kadrlyq áleýetti damytý maqsatynda jyl saıyn áleýmettik qyzmetkerlerdi daıarlaýǵa 350 bilim berý granty bólinedi. 

Odan bólek, BUU Damý baǵdarlamasynyń qoldaýymen Skills.enbek.kz tsıfrlyq platformasynda jańa oqý modýlderi ázirlendi. Qazir zamanaýı keıs-menedjment jáne tsıfrlandyrý standarttary boıynsha 10 myńnan astam maman qashyqtan oqydy. 

Vedomstvonyń habarlaýynsha, atalǵan jańa tásil mamandardyń kásibıligi men naqty biliktiligine basymdyq beriletin zamanaýı áleýmettik kómek júıesin qalyptastyrýǵa múmkindik beredi. 

Eske sala keteıik, Eńbek jáne halyqty áleýmettik qorǵaý mınıstri Svetlana Jaqypovanyń málimdeýinshe, 10 myń áleýmettik qyzmetkerdiń beıindi mamandyǵy joq.