Elimizde alaıaqtyqtyń basym bóligi sheteldik serverler men VPN arqyly júzege asyrylady

ASTANA. KAZINFORM – Qazaqstandyqtar kún saıyn derlik belgisiz nómirlerden qońyraý shalyp, «bank qyzmetkerimiz» deıtinderge nemese jeńil olja usynatyn ınternet-jarnamalarǵa tap bolady. 

Qamqor.gov.kz derekteri boıynsha ótken jyly 301 768 is tirkelgen, ıaǵnı ortasha eseppen kúnine 800-den astam jańa is tirkelip otyrǵan. Zardap shekkenderdiń jartysynan kóbi (173 myńnan astam is) áıelderge qatysty. Jalpy alaıaqtyqtyń 50%-dan astamy (177 325 is) ǵalamtor arqyly jasalǵan. 

Bul isterdiń basym bóligi ashylmaǵan kúıi qalyp otyr. Sotqa tek 99 myńy ǵana jiberilgen. Al 132 myńnan astam is (shamamen 34%-y) qylmyskerdiń kim ekeni belgisiz bolǵandyqtan toqtap tur. Ásirese, ınternet-alaıaqtyq bóliminde bul kórsetkish tipti joǵary (99 881 is). Bul sandar qylmyskerlerdiń deni sheteldik serverlerdi, VPN-arnalardy jáne basqa memleketterdiń bank kartalaryn qoldanatynyn kórsetedi.

Eske sala keteıik, buǵan deıin Antıfrod-ortalyq alaıaqtyq áreketterdiń 67%-y jalǵan ınvestıtsııalar men onlaın-dúkenderge qatysty ekenin aıtqan edi.