Elimizde «Aiala» alǵashqy respýblıkalyq art-eko festıvali ótedi

ASTANA. KAZINFORM - Halyqaralyq balalardy qorǵaý kúninde Beıbitshilik jáne kelisim saraıynda alǵashqy respýblıkalyq «Aiala» art-eko festıvali ótedi.

Іs-sharany Mádenıet jáne aqparat mınıstrligi, «Azamattyq bastamalardy qoldaý ortalyǵy» KEAQ uıymdastyrady. Bas demeýshi – «Halyq» qaıyrymdylyq qory. Mádenıet jáne aqparat mınıstrliginiń málimetinshe, festıval elimizdiń túkpir-túkpirinen kelgen oqýshylar úshin óner arqyly qorshaǵan ortaǵa qamqorlyq kórsetýge múmkindik berdi. 

Bir aıdyń ishinde 200-den astam oqýshy 6 sanat boıynsha ekologııa taqyrybynda qyzyqty jumystar jasaı otyryp, ózderiniń talanty men shyǵarmashylyǵyn kórsetti:

Beınele – beıneleý óneri (foto, keskindeme);
Árle – perfomans (músin jáne ınstallıatsııa);
Qara – vıdeo túsirý (fılmder, rolıkter) ;
Sezin – art perfomans (teatr, kóshe perfomanstary, fleshmobtar) ;
Sóıle – mýzyka jáne poezııa (ánder, óleńder) ;

Órnekte – sándik-qoldanbaly óner (toqyma, keramıka buıymdary).

Qazir 36 fınalıstiń esimi belgili. Biraq jeńimpazdar 1 maýsym – Halyqaralyq balalardy qorǵaý kúninde jarııalanady. Sondaı-aq festıval aıasynda kıiz basý, keskindeme, qarjylyq saýattylyq jáne makýlatýradan panno jasaý boıynsha sheberlik synyptary ótedi. Balalarǵa arnap ınteraktıvti oıyn-saýyq, keıterıng uıymdastyrylyp, merchter satylady. Odan túsken qarajat ekologııalyq qorlarǵa aýdarylady. Іs-sharanyń arnaıy qonaǵy retinde «JOLDA» bı teatry shaqyrylǵan.