Elimizde aǵzany transplanttaýǵa donor jetispeıdi

Qazaqstanda aǵza donorlyǵy boıynsha problema bar. Myńdaǵan naýqastar donor kútýde, dep habarlaıdy QazAqparat tilshisi.

Bıyl 9 qazanda Qazaqstan aǵza donorlarynyń tapshylyǵy máselelerin kóterý jáne elimizde aǵza donorlyǵy men transplantatsııany damytýdyń mańyzdylyǵy týraly arnaıy kún atalyp ótiledi.

«Búgingi tańda Qazaqstanda donorlyq organdarǵa suranys joǵary. Sońǵy kórsetkish boıynsha, 3 953 naýqasqa kútý paraǵy berildi. Olar búırek, baýyr, ókpe, júrek organdaryna muqtaj jandar, ıaǵnı donor kútip júr. Sondaı-aq, elimizde qaıtys bolǵannan keıin aǵzasyn donor retinde berý boıynsha statıstıkasy tómen. Aıtar bolsaq, 2022 jyly ne bary 4 máıit donor retinde 16 adamnyń ómirin saqtap qaldy», - dedi Transplanttaýdy jáne joǵary tehnologııalyq medıtsınalyq qyzmetti úılestirý jónindegi respýblıkalyq ortalyqtyń qoǵammen baılanys mamany Jánibek Ýspanov Astana qalalyq kommýnıkatsııalar qyzmeti alańynda ótken baspasóz máslıhatynda.

Odan bólek, Astanada 7 qazanda Kereı-Jánibek handar kóshesi, 3 mekenjaıynda «Ashyq esik» kúni ótedi. Bul kúni transplantolog dárigerler 18 jastan asqan naýqastarǵa transplantatsııa boıynsha tegin keńes beredi. Sondaı-aq, qaıtys bolǵannan keıin organdardyń donor retinde qaldyrýyna nıet bildirý, kútý paraǵyn qurý jáne júrgizý máseleleri boıynsha, sondaı-aq týystyq aǵza donorlyǵy máseleleri boıynsha keńester beredi.

Brıfıngte aıtylǵan málimetke sáıkes, Astanada organ transplantatsııasy kezeginde 536 naýqas tur.