Elimizde agrarlyq týrızm qyzmetiniń erejeleri ázirlenip jatyr

ASTANA. KAZINFORM – Búginde elimizde agro jáne aýyl týrızmin damytý baǵytynda birqatar is-shara qolǵa alyndy. Tolyǵyraq Týrızm jáne sport mınıstri Erbol Myrzabosynov aıtyp berdi.

- Aýyldyq týrızmdi damytý – mańyzdy baǵyttardyń biri. Bul tek mádenıetti jáne dástúrli ómir saltyn saqtaýǵa emes, sonymen qatar óńirlerdiń turaqty damýyna múmkindik beredi. «Úzdik týrıstik aýyl – 2025» ulttyq baıqaýy osy baǵytty ilgeriletý úshin ótkizildi. Baıqaý arqyly bolashaǵy bar aýyldar anyqtalyp, jergilikti halyqtyń týrızmge qatysýy artty. Sonymen qatar agro-týrızmdi ilgeriletý maqsatynda fermerlerge týrıstik qyzmetpen aınalysý múmkindigin berý úshin zań jobasy daıyndalyp jatyr. Qazir Aýyl sharýashylyǵy mınıstrligimen birlesip, agrarlyq týrızm qyzmetiniń erejeleri ázirlenip jatyr, - dedi Erbol Myrzabosynov Úkimet otyrysynda.

Mınıstrdiń málimdeýinshe, atalǵan ereje aýyldaǵy shaǵyn jáne otbasylyq kásipkerlikti zańdastyrýǵa jáne qoldaýǵa baǵyttalǵan.

- Etnotýrızmdi qamtıtyn agro-týrızm boıynsha ádistemelik qural ázirlendi. Bul qural fermerler men qonaqúı ıelerine arnalǵan. 900-den astam aýyl turǵyny arnaıy trenıngterden ótti. Olarǵa qonaqúı ashý men júrgizý tásilderi úıretildi, - deıdi vedomstvo basshysy.

Aıta keteıik, Qazaqstan TMD-da birinshi bolyp týrızm statıstıkasyna mobıldi derekterdi engizdi. 

Eske salaıyq, byltyr Qazaqstanǵa 15 mln-nan astam sheteldik týrıst kelgen.