Elimizde aǵashtyń keı túrlerin eksporttaýǵa tyıym salynýy múmkin

ASTANA. KAZINFORM – Qazaqstanda aǵash materıaldarynyń jekelegen túrlerin el aýmaǵynan áketýge alty aı merzimge tyıym salý josparlanyp otyr.

aǵash
Foto: Kazinform/JI

QR Ónerkásip jáne qurylys mınıstrligi tıisti buıryq jobasyn jarııalap, 4 jeltoqsanǵa deıin qoǵamdyq talqylaýǵa usyndy.

Qujatta shyǵarylǵan eline qaramastan, taýarlardyń jekelegen túrlerin Qazaqstan aýmaǵynan áketýge tyıym salý kózdelgen.

Shekteý EAEO Syrtqy ekonomıkalyq qyzmetiniń taýar nomenklatýrasy (SEQ TN) boıynsha 4401, 4403, 4404, 4406 jáne 4407 kodtaryna jatatyn taýarlarǵa qatysty bolady.

Sonymen qatar, birqatar erekshelik qarastyrylǵan. Atap aıtqanda, tyıym temirjol jáne tramvaı joldaryna arnalǵan qylqan japyraqty aǵashtardan jasalǵan aǵash shpaldarǵa, sondaı-aq, Qazaqstanda óndirilgen aǵash túıirshikterine (pelletterge) qoldanylmaıdy.

Buıryq jobasynda atap ótilgendeı, bul bastama otandyq aǵash óńdeý ónerkásibin damytýǵa baǵyttalǵan.

Qujat Qazaqstan Respýblıkasynyń zańnamasyna jáne Eýrazııalyq ekonomıkalyq odaq týraly sharttyń normalaryna sáıkes ázirlengen.

Aıta keteıik, buǵan deıin Oralda Jaıyq jaǵalaýyndaǵy aǵashtar nelikten kesilip jatqanyn jazǵanbyz.

Odan bólek, Pavlodar oblysynda otyndyq aǵash qansha turatynyn jarııalaǵanbyz.