Elimizde AES salatyn vendor birinshi jartyjyldyqtyń sońynda anyqtalady

ASTANA. KAZINFORM — Qazaqstanda atom elektr stansasyn salatyn shetel ókilderi elimizde boldy. Bul týraly Energetıka vıtse-mınıstri Suńǵat Esimhanov málim etti.

— Mınıstrdiń basshylyǵymen barlyq áleýetti elder bizge keldi, tıisti jumystardy júrgizip jatyrmyz, sonymen qatar vendorlarǵa qoıylatyn talaptar tizimi anyqtaldy. Olar qazir keri baılanys ornatyp jatyr, — dedi Suńǵat Esimhanov Úkimet úıinde ótken baspasóz máslıhatynda. 

Vıtse-mınıstrdiń aıtýynsha, atom elektr stansasyn salý boıynsha qorytyndy birinshi jartyjyldyqtyń sońynda shyǵady. 

— Aldyn-ala nátıjeler jarııalanady. Birinshi jartyjyldyqtyń sońynda áleýetti vendor anyqtalady, — deıdi ol. 

Eske sala keteıik, byltyr jyl sońynda Energetıka mınıstri Almasadam Sátqalıev elde AES-ti kim salatyny 2025 jyldyń birinshi jartysynda belgili bolatynyn aıtqan edi. 

Sondaı-aq Energetıka mınıstrligi qazir AES qurylysyndaǵy konsortsıým aıasynda 4 elmen kelissóz júrip jatqanyn málimdedi.