Elimizde advokattyq mantııa bekitildi

ASTANA. KAZINFORM — Qazaqstanda advokattardyń kásibı formasy bekitildi.

Respýblıkalyq advokattar alqasynyń tóralqasy advokattyq mantııa men onyń sıpattamasyn bekitti. Bul quqyq «Advokattyq qyzmet jáne zań kómegi týraly» Qazaqstan Respýblıkasy Zańynyń 33-babynyń 6-tarmaǵynda kózdelgen. 

Mantııa — advokattyń basqa jeke sýbektilerden erekshelenetin erekshe qoǵamdyq-quqyqtyq mártebe belgisi. Advokat kásibı qyzmetin júzege asyrýǵa kedergi keltiretin qýdalaýdan, tintýden jáne basqa da aralasýlardan qorǵaıtyn erekshe kásibı artyqshylyqqa ıe.

— Mantııa kııý — mindet emes, quqyq. Árbir advokat sot otyrystarynda mantııa kııýdiń qajettiligin ózi sheshýge quqyly. Sonymen qatar, mantııany kásibı mártebege saı saltanatty is-sharalarda da kııýi múmkin. Mantııanyń formasy keń talqylaý nátıjeleri boıynsha tańdalady. 2024 jyly advokattardyń III respýblıkalyq spartakıadasy aıasynda advokattyq mantııa jobalarynyń alǵashqy tusaýkeseri ótti. Sondaı-aq, anonımdi saýalnama júrgizildi, oǵan usynylǵan modelder týraly óz pikirlerin bildirgen 300-ge jýyq advokat qatysty, — delingen respýblıkalyq advokattar alqasynyń baspasóz qyzmeti taratqan habarlamada.

Aldyn ala talqylaý qorytyndysy boıynsha advokattar tóralqasy búkil advokat qaýymdastyǵy arasynda keńirek jáne ashyq saýalnama júrgizý týraly sheshim qabyldady. 

— Oǵan elimizdiń barlyq óńirinen 3 myńnan astam advokat qatysty. Daýys berýge úsh qazaqstandyq dızaınerdiń mantııa úlgileri shyǵaryldy. Saýalnama nátıjeleri boıynsha, sondaı-aq aýmaqtyq alqalar usynǵan ustanymdardy eskere otyryp, tóralqa mantııa modelin bekitti, — dedi respýblıkalyq advokattar alqasynyń tóraǵasy Aıdyn Bıkebaev. 

Mantııanyń negizgi elementteri:

● Qara mata, aspan-kógildir tústi jaǵasy bar, bul tús Qazaqstan týynyń túsin beıneleıdi; 
● Mantııanyń jaǵasy men sándik lentalarynda «Qorǵaý» ulttyq órnegi qoldanylǵan, bul «qorǵaý» nemese «tumar» degendi bildiredi (Sımvol memlekettik keńesshi Erlan Karın qurastyrǵan «OIU Qazaq Design» jınaǵynan alyndy);
● Mantııanyń ashyq fasony — túımesiz jáne bekitkishsiz — advokattyń erkindigi men táýelsizdigin beıneleıdi.
● Órnekteri bar sımmetrııaly kók lentalar teńdikti, tepe-teńdikti jáne ádilettilikti bildiredi.

Ár advokat mantııany kez kelgen tigin sheberhanasynda tigýge quqyly. Jasaý protsesi erejede kórsetilgen sıpattamaǵa sáıkes júzege asyrylady. 

Advokattyq mantııany kııý tártibi men sıpattamasy týraly bekitilgen erejemen respýblıkalyq advokattar alqasynyń saıtynda advokatura.kz tanysýǵa bolady. 

Eske salaıyq, jyl basynda elimizde advokattardyń qyzmeti qansha turatyny týraly sholý jasaǵan edik.