Elimizde adamdardy esirtki bıznesine jumysqa alýdyń halyqaralyq jelisi áshkerelendi
ASTANA. KAZINFORM — Qazaqstan Іshki ister mınıstrligi birneshe memleketti qamtyǵan aýqymdy arnaıy operatsııa barysynda azamattardy esirtki bıznesine tartýmen aınalysqan halyqaralyq qylmystyq jeliniń jolyn kesti. Operatsııa bir jyldan astam ýaqytqa sozylyp, Ýkraına men Albanııanyń quqyq qorǵaý organdary, Qazaqstan jáne Ýkraına prokýratýralary, Interpol jáne AQSh-tyń Esirtkige qarsy kúres basqarmasymen birlesip júrgizilgen.
Qylmystyq top adamdardy zańdy jumysqa ornalastyrýdy syltaý etip, call-ortalyq operatorlary, HR-menedjerler, hımıkter, kýrerler, esirtki jasyrýshylar, logıster men qoıma qyzmetkerlerin jaldaǵan. Olarǵa ońaı ári joǵary tabys ýáde etilgenimen, is júzinde halyqaralyq esirtki bıznesine tartqan.
ІІM málimetinshe, qylmystyq qurylymdaǵy rólder qatań bólingen. Uıymdy kórshiles eldiń 36 jastaǵy azamaty basqarǵan.
— Tartymdy kórinetin bos jumys oryndarynyń artynda adamdy esirtki bıznesine tartý turǵan. Al adam bul iske kirgennen keıin odan shyǵýǵa múmkindik bermegen, — dedi QR ІІM esirtki qylmysyna qarsy is-qımyl komıteti tóraǵasynyń orynbasary Qýandyq Áljanov.
Tergeý barysynda Ýkraınada adamdardy zańsyz áreketke tartýmen aınalysqan call-ortalyqtarda 26 tintý júrgizilip, tórt myńǵa jýyq tsıfrlyq aıǵaq tárkilendi. Olardy taldaý nátıjesinde Telegram jelisindegi 31 esirtki dúkeni, qylmystyq shemany uıymdastyrýshylar jáne oǵan tartylǵan júzdegen adam anyqtaldy.
Mamyr aıynda Kıev pen Kıev oblysynda Qazaqstan ІІM ókilderiniń qatysýymen 70 tintý júrgizildi. Nátıjesinde adamdardy qylmysqa tartqan call-ortalyqtardyń jumysy toqtatylyp, qylmystyq qoǵamdastyqtyń 27 belsendi múshesi anyqtaldy.
Shilde aıynda Qazaqstan aýmaǵynda ýkraınalyq quqyq qorǵaý organdary ókilderiniń qatysýymen taǵy 15 tintý júrgizildi. Onyń barysynda elimizde esirtki satýǵa qatysy bar jeli músheleri ustaldy.
Operatsııanyń qorytyndy kezeńinde Ýkraınanyń bes oblysy men Kıev qalasynda taǵy 35 tintý júrgizildi. Halyqaralyq jeliniń azamattardy qylmysqa tartýmen aınalysqan eki býyny joıyldy.
Arnaıy operatsııa barysynda sıntetıkalyq esirtki bar 24 keli qospa, 3,5 myńnan astam qoldan jasalǵan shylym jáne daıyn kúıinde ólshep salynǵan eki myńǵa jýyq paket tárkilendi. Jeti adam ustalyp, qylmystyq shemaǵa qatysqan toǵyz adamǵa aıyp taǵyldy.
ІІM ókiliniń aıtýynsha, tárkilengen zattardyń ózi myńdaǵan esirtki dozasynyń taralýyna jol bermegen.
Quqyq qorǵaý organdary halyqaralyq jelini uıymdastyrýshylar men oǵan qatysy bar barlyq adamdardy anyqtaý jumystaryn jalǵastyryp jatyr.
ІІM azamattardy ınternettegi «ońaı ári joǵary tabys» týraly kúmándi usynystarǵa senbeýge úndedi. Vedomstvonyń eskertýinshe, tartymdy bolyp kórinetin bos jumys oryndarynyń artynda halyqaralyq esirtki jelisi turýy múmkin.
Eske salaıyq, buǵan deıin elimizde jyl basynan beri 17 esirtki zerthanasy anyqtalǵanyn habarlaǵan edik.
