Elimizde 9,1 mln tonna mal azyǵy daıyndaldy
ASTANA. KAZINFORM – Qazaqstanda mal azyǵyn daıyndaý naýqany qarqyndy jalǵasyp jatyr. Oblys ákimdikteriniń qazirgi derekterine sáıkes, búgingi kúnge deıin 9,1 mln tonnadan astam mal azyǵy ázirlengen. Onyń ishinde 8,3 mln tonna pishen, 850 myń tonna pishendeme jáne 35 myń tonnadan astam súrlem bar.
2026–2027 jyldardaǵy maldy qystatý kezeńine daıyndyq aıasynda Aýyl sharýashylyǵy mınıstrligi oblys ákimdikterimen birlesip mal azyǵyn daıyndaý josparyn bekitti. Josparǵa sáıkes 25,7 mln tonna pishen, 2,3 mln tonna pishendeme, 2,8 mln tonna súrlem, 4,8 mln tonna saban jáne 5,7 mln tonna qunarlandyrylǵan jem daıyndalmaq.
Aýyl sharýashylyǵy mınıstrligi málimetinshe, bıyl mal azyqtyq daqyldardyń egis alqaby 3,32 mln gektardan asyp, ótken jylmen salystyrǵanda 243 myń gektarǵa ulǵaıdy. Sonymen qatar egistik alqaptaryndaǵy mal azyqtyq daqyldardyń úlesi 14 paıyzǵa deıin jetkizildi. Bul mal sharýashylyǵynyń jemshóp qoryn nyǵaıtýǵa múmkindik beredi.
Mınıstrlik turaqty túrde jedel shtab otyrystaryn ótkizip, onda mal azyǵyn ýaqtyly daıyndaý, óńirlerdiń jumysyn úılestirý jáne aldaǵy qysqy kezeńde mal sharýashylyǵy salasynyń jemshópke degen qajettiligin tolyq qamtamasyz etý máselelerin qaraıdy.
Salany mal azyǵymen qamtamasyz etýdiń qosymsha tetikteriniń biri – «Azyq-túlik kelisimshart korporatsııasy» UK» aktsıonerlik qoǵamynyń úlesi. Bıylǵy jyldyń 1 qyrkúıegine deıin kompanııa maýsymaralyq kezeńde qus jáne mal sharýashylyǵy kásiporyndaryna jemdik astyqty belgilengen baǵamen ótkizedi. Osy maqsatta 201,3 myń tonna kóleminde jemdik astyq qory qalyptastyrylyp, onyń 21,7 myń tonnasy aýyl sharýashylyǵy taýaryn óndirýshilerge satyldy.
Salany mal azyǵymen turaqty qamtamasyz etýge qurama jem óndirisi ınfraqurylymynyń damýy da oń yqpal etip otyr. Búginde elimizde iri kásiporyndardy, sondaı-aq qus fabrıkalary men mal sharýashylyǵy keshenderiniń janyndaǵy sharýashylyqishilik qurama jem tsehtaryn qosa alǵanda, 76 qurama jem zaýyty jumys isteıdi. Olardyń jyldyq jıyntyq óndiristik qýaty shamamen 4 mln tonna.
2026 jyly mal sharýashylyǵyn damytýǵa 300 mlrd teńgeden asa qarjy baǵyttalǵanyn jazǵan bolatynbyz.
