Elimizde 9 aıdyń qorytyndysy boıynsha myńnan astam náresteden kóz aýrýy anyqtaldy

ASTANA. KAZINFORM – Densaýlyq saqtaý mınıstrligi shala týǵan nárestelerdiń oftalmologııalyq skrınıngin engizý jáne júıeli qarjylandyrý arqyly balalardaǵy soqyrlyqtyń aldyn alý sharalary jónindegi depýtattyq saýalǵa jaýap berdi. 

Vedomstvo málimdeýinshe, 2023 jylǵy 31 naýryzdaǵy №52 buıryqpen bekitilgen neonataldyq kómek kórsetýdi uıymdastyrý standarttaryna saı jańa týǵan náresteler týa bitken damý aqaýlaryna, tuqym qýalaıtyn almasý aýrýlaryna, kórý jáne estý fýnktsııalarynyń buzylýyna skrınıngtik tekserýden ótedi.

Mınıstrlik shala týǵan nárestelerdiń retınopatııasyn (NR) erte anyqtaý men ýaqtyly emdeýdi negizgi mindetterdiń biri dep atap ótti. 

– Skrınıngtiń maqsaty – balalardaǵy qaıtymsyz soqyrlyqtyń aldyn alý. Baǵdarlama NR erte dıagnostıkasyn, mamandandyrylǵan oftalmologııalyq kómekti ýaqtyly kórsetýdi, ata-analarǵa keńes berýdi jáne skrınıng tıimdiligin monıtorıngileýdi qamtıdy, - delingen qujatta. 

Mınıstrlik dereginshe, bıyl úshinshi toqsannyń qorytyndysy boıynsha neonataldyq skrınıngpen qamtý 98,2% boldy (248 502 náreste). Al NR boıynsha qaýip tobyna kiretin shala týylǵan balalardy oftalmologııalyq skrınıngpen qamtý 96,88%-dy (6 225 bala) qurady. Onyń ishinde 1 086 náresteden retınopatııa anyqtalyp, 399-y shuǵyl em aldy.

– Úshinshi deńgeıdegi perınataldyq ortalyqtar retınopatııa skrınıngine qajetti oftalmologııalyq qurylǵylarmen tolyq qamtamasyz etilgen. Sonymen qatar vıtreoretınaldy operatsııalar mindetti áleýmettik medıtsınalyq saqtandyrý aıasynda Qazaq kóz aýrýlary ǵylymı-zertteý ınstıtýtynda jáne Astana qalasyndaǵy №2 kópbeıindi qalalyq aýrýhanada júrgiziledi, - dedi Densaýlyq saqtaý birinshi vıtse-mınıstri Tımýr Sultanǵazıev. 

Shala týǵan nárestelerdi (onyń ishinde sanavıatsııa arqyly) belsendi retınopatııa kezinde mamandandyrylǵan kómek kórsetetin úshinshi deńgeıdegi klınıkalarǵa tasymaldaý tetigi de jolǵa qoıylǵan.

Sonymen qatar mınıstrlik medıtsınalyq uıymdardyń shyǵystaryn óteý klınıkalyq-shyǵyndy toptar boıynsha júrgiziletinin atap ótti. 

– 2024 jylǵy 1 maýsymnan bastap neonatologııa qyzmetteriniń tarıfteri orta eseppen 36,5%-ǵa ósirilip, standarttarǵa sáıkes barlyq shyǵyndardy óteýge múmkindik berdi, - delingen jaýapta. 

Aıta keteıik, Qazaqstanda 2025 jyldyń birinshi jartyjyldyǵynda náreste ólimi 22,7 paıyzǵa tómendedi.