Elimizde 8 mln tonnaǵa jýyq astyq bastyryldy

ASTANA. KAZINFORM – Búgingi tańda negizgi dándi daqyldar boıynsha 5,4 mln gektardan astam dándi jáne burshaqty daqyldar jınaldy. Ortasha ónimdiligi 14,7 ts / ga bolǵan kezde 8 mln tonnaǵa jýyq astyq bastyryldy. Bul týraly QR AShM baspasóz qyzmeti málim etti. 

Máselen, bıdaı 3,7 mln ga alqapta jınaldy, ónimdiligi 14,2 ts/ga 5,4 mln tonna bastyryldy, arpa — 1,2 mln ga, ónimdiligi 15,8 ts/ga 1,9 mln.tonna bastyryldy, suly — 99,4 myń ga, ónimdiligi 14,7 ts/ga 145,9 myń tonna bastyryldy.

«Bıylǵy jyly maıly daqyldar ortasha ónimdiligi 10,2 ts/ga 67,3 myń ga alqaptan jınaldy, 68,6 myń tonna bastyryldy. 41,1 myń gektar alqaptan 260,4 ts/ga ónimdilikte 1 mln tonnadan astam kartop jınaldy, kókónis daqyldary 77,4 myń gektardan 242 ts/ga ónimdilikte 1,9 mln tonnaǵa jýyq jınaldy», — delingen habarlamada.

Baqsha daqyldary 92,4 myń ga alqaptan jınaldy, ónimdiligi 252,9 ts/ga, jalpy alym 2,3 mln tonnadan asty.

Egin jınaý naýqanyna 149,9 myń traktor, 37,6 myń astyq jınaıtyn kombaın, 14,9 myń oraq jáne 195 myń birlik basqa tehnıka jumyldyryldy.

Esterińizge sala keteıik, kóktemgi egis jáne egin jınaý jumystaryn jeńildetilgen qarjylandyrý kólemi 580 mlrd.teńgeni qurady, bul ótken jyldarmen salystyrǵanda 3 ese kóp.

Buǵan deıin Almaty oblysy astyq jınaýdy aıaqtaýǵa jaqyn ekenin jazǵan bolatynbyz. 

Egin jınaý naýqanyn ótkizýdiń barlyq máseleleri erekshe baqylaýda.