Elimizde 72 temirjol vokzalyn rekonstrýktsııalaý aıaqtaldy
ASTANA. KAZINFORM – Memleket basshysy Qasym-Jomart Toqaevtyń temir jol vokzaldary men olardyń ınfraqurylymyn abattandyrý jónindegi tapsyrmasyn oryndaý aıasynda Qazaqstanda búkil el boıynsha 124 vokzaldy rekonstrýktsııalaý boıynsha aýqymdy baǵdarlamasy júzege asyrylyp jatyr. Bul týraly Úkimettiń baspasóz qyzmeti habarlady.
Jumystar vokzal ınfraqurylymyn keshendi jańǵyrtýdy kózdeıdi. Olar: ǵımarattar men ınjenerlik jelilerdi jańartý, platformalar men vokzal mańyndaǵy aýmaqtardy rekonstrýktsııalaý, kútý zaldaryn keńeıtý, zamanaýı qaýipsizdik júıelerin, lıftiler men kótergish qurylǵylardy ornatý, sondaı-aq kedergisiz orta qurý. Eń qatty tozǵan nysandarda eski ǵımarattar tolyǵymen buzylyp, ornyna jańa jolaýshylar kesheni salyndy.
2026 jylǵy 20 tamyzdaǵy jaǵdaı boıynsha, Úkimet elimizdiń 17 oblysynda 72 temirjol vokzalyn rekonstrýktsııalaýdy aıaqtady. Tamyz aıynyń sońyna deıin taǵy 34 vokzaldy paıdalanýǵa berý josparlanyp otyr, 15 nysanda jumystar qyrkúıek aıynyń sońyna deıin bitedi.
Jalpy alǵanda, 2026 jyly 124 vokzaldyń 121-in rekonstrýktsııalaý josparlanyp otyr. Taǵy úsh iri nysan – Astana, Almaty jáne Túrkistan vokzaldary 2027 jyly aıaqtalady. Olardyń tarıhı-arhıtektýralyq qundylyǵy bar, sondyqtan jumystar ǵımarattardyń bastapqy sáýlettik kelbetin saqtaýǵa qoıylatyn talaptardy eskere otyryp, jeke keste boıynsha júrgizilip jatyr.
Vokzaldardy jańǵyrtý ınfraqurylymdy artyp kele jatqan júktemege beıimdeýge jáne iri toraptyq stansalarmen qatar óńirlerde de jolaýshylarǵa qyzmet kórsetý sapasyn arttyrýdy qamtamasyz etedi.
Qabyldanyp jatqan sharalar temirjol ınfraqurylymynyń senimdiligin arttyrýǵa, qyzmet kórsetý sapasyn jaqsartýǵa jáne jolaýshylar úshin neǵurlym qolaıly jaǵdaı jasaýǵa múmkindik beredi. Temirjol tasymalyn damytý jáne vokzaldardy jańartý aıasynda jolaýshylar aǵynynyń odan ári ósýi josparlanǵan. Bul kólik toraptaryna júktemeni arttyrady jáne qyzmet kórsetýdiń zamanaýı standarttaryn saqtaýdy talap etedi.
Anyqtama: Aýyl, Belaǵash, Qonaev, Aqkól, Kýrort-Borovoe, Makınka, Shortandy, Aqqystaý, Ganıýshkıno, Rıdder, Shemonaıha, Taldyqorǵan, Qazaqstan, Semıglavyı Mar, Shyńǵyrlaý, Aısa, Nura, Qaraǵandy-Suryptaý jup, Qaraǵandy-Suryptaý taq, Jańa-Qaraǵandy, Qusmuryn, Amanqaraǵaı, Talap, Jańaqorǵan, Qazaly, Shıeli, Bozshakól, Taıynsha, Jańaesil, Saýmalkól, Temirtaý, Jaqsy, Qarasor, Shetpe, Jetisý, Saryoba, Arshaly, Sarybel, Darııa, Myrza, Shamalǵan, Jelezorýdnyı, Uzynaǵash, Sekseýil, Saǵyz, Dossor, Maqat, Aqadyr, Tımýr, Arys-2, Moıynty, Jaltyr, Derjavınsk, Ereımentaý, Erkinshilik, Óleńti, Shalqar, Shubarqudyq, Borandy, Kóktuma, Aqshı, Shiderti, Qalqaman, Mankent, Jańaarqa, Qyzyljar, Qarajal, Oral, Altaı, Kúmistaý, Arqalyq, Túlkibas vokzaldary paıdalanýǵa berildi.
Premer‑mınıstrdiń birinshi orynbasary Nurlybek Nálibaev 124 temirjol vokzalyn jańǵyrtý jáne rekonstrýktsııalaý máseleleri boıynsha tapsyrma bergen edi.
