Elimizde 7 mıllıonǵa jýyq bala turady
ASTANA. KAZINFORM — Oqý-aǵartý mınıstrliginiń keńeıtilgen alqa otyrysynda balalardyń quqyqtaryn qorǵaý salasyndaǵy memlekettik saıasatty iske asyrý máselelerine erekshe nazar aýdaryldy.
Memleket basshysynyń tapsyrmasymen alǵash ret 2026-2030 jyldarǵa arnalǵan «Qazaqstan balalary» tujyrymdamasy ázirlendi. Qujat balalyq shaq máselelerine biryńǵaı kózqaras qalyptastyryp, qoldanystaǵy sharalar men baǵdarlamalardy tutas júıege biriktiredi.
— Tujyrymdamanyń negizgi maqsaty — árbir balanyń bilim alý, densaýlyǵyn saqtaý, áleýmettik qorǵalý jáne otbasynda tárbıelený quqyqtaryn qamtamasyz etetin júıeli ári úılestirilgen tásildi qalyptastyrý. Osy maqsatqa qol jetkizý úshin qujat balalardyń qaýipsizdigin kúsheıtýge, psıhologııalyq jáne áleýmettik qoldaý júıesin jetildirýge, sondaı-aq vedomstvoaralyq úılestirýdi nyǵaıtýǵa baǵyttalǵan. Qazaqstan balalardyń quqyqtaryn qorǵaýǵa arnalǵan maqsatty ulttyq strategııasy bar sanaýly memleketterdiń biri, — dedi Juldyz Súleımenova.
Búginde elimizde 6 902 492 bala turady, bul halyq sanynyń úshten birin quraıdy. Sońǵy 10 jylda balalar sany shamamen 1,5 mıllıonǵa artty. Bul ınfraqurylym men qoldaý júıesin odan ári nyǵaıtýdy talap etedi.
Memleket basshysynyń tapsyrmalaryn iske asyrý aıasynda balalardyń quqyqtaryn qorǵaýdy kúsheıtýge jáne zorlyq-zombylyqqa nóldik tózimdilik prıntsıpin engizýge baǵyttalǵan 10 zań qabyldandy. 2025 jyly zańnamaǵa balalardyń quqyqtaryn buzǵany úshin ákimshilik jaýapkershilikti bekitetin qosymsha ózgerister engizildi. 237 myńnan astam bala psıhologııalyq-medıtsınalyq-pedagogıkalyq qoldaýmen qamtylǵan, onyń ishinde shamamen 17 myń bala úıde bilim alady. Bilim berý uıymdarynda 3,8 myń pedagog-assıstent jáne 10 myńnan astam arnaıy pedagog jumys isteıdi.
Balalardyń tamaqtanýy men sanıtarııalyq qaýipsizdigine erekshe kóńil bólinip otyr. Mekteptegi tamaqtanýdyń jańa standarty engizilip, ónim sapasy men sanıtarııalyq talaptardyń saqtalýyna baqylaý kúsheıtildi. Mektepke deıingi bilim berý salasynda «Aqsha balaǵa beriledi» qaǵıdaty boıynsha vaýcherlik qarjylandyrý engizildi. Bul tetik kezekti eki esege qysqartýǵa jáne 21 mlrd teńgeden astam qarajatty únemdeýge múmkindik berdi.
Elimizde 11 900 balabaqsha jumys isteıdi, onda shamamen 1 mıllıon bala tárbıelenýde, al mektepke deıingi synyptarda 163 myńnan astam bala bilim alýda.
«Qazaqstan balalary» tujyrymdamasyn iske asyrý balalar saıasatyn júıeli damytýǵa jáne árbir bala úshin teń múmkindikter qalyptastyrýǵa baǵyttalǵan.
Aıta ketelik Aıda Balaeva 2030 jylǵa deıingi «Qazaqstan balalary» tujyrymdamasyn usynǵan edi.