Elimizde 68 mln-nan astam dárilik zat qaptamasy tańbalandy – mınıstr
ASTANA. KAZINFORM – Jyl basynan beri naryqqa 145 dárilik zatty ótkizýge ruqsat berilmedi. Bul týraly Úkimet otyrysynda QR Densaýlyq saqtaý mınıstr Aqmaral Álnazarova málim etti.
«Qazirgi kezde Qazaqstan Respýblıkasynda 6 891 dárilik zat pen men 13 myńnan astam medıtsınalyq quraldar men jabdyqtar tirkelgen. Elimizde dárilik zattar men medıtsınalyq maqsattaǵy quraldarǵa zerthanalyq saraptama jasaý boıynsha 3 zerthana jumys istep jatyr. Bul zerthanalar dáriniń sapasyna, qaýipsizdigine jáne tıimdiligine saraptama júrgizedi. Saraptama qorytyndasy boıynsha dári-dármektiń qoıylǵan talaptarǵa sáıkes kelmeýine baılanysty jyl basynan beri naryqqa 145 dárilik zat nemese berilgen ótinimderdiń 2,6%-y engizilmedi», - dedi A. Álnazarova.
Osy oraıda ol 2024 jyldyń 1 shildesinen bastap elimizde dárilik zattardy tańbalaý men qadaǵalaý engizilgenin eske saldy. Bul óz kezeginde dári-dármektiń zańsyz aınalymyn anyqtap, olardyń qoldanysqa ótýine bóget bolady.
«Qazir 68 mln-nan (39,3 mln – sheteldik, 29,3 mln - otandyq) astam dárilik zat qaptamasy tańbalanyp, onyń 28,5 mln-y aınalymǵa engizildi. Bul jumysqa otandyq dári-dármek óndirýshiler, tasymaldaýshylar, jeke aınalymdaǵy dárihanalar men 1 784 medıtsınalyq uıym qatysyp otyr. Bul óz kezeginde tegin medıtsınalyq kómektiń kepildik berilgen kólemi (TMKK) men mindetti áleýmettik medıtsınalyq saqtandyrý (MÁMS) aıasynda dárilik zattardyń tolyq aınalymyn (ımport men eksportty) baqylaýdy qamtamasyz etýge múmkindik beredi», - dedi mınıstr.
