Elimizde 600-den astam dáriniń baǵasy arzandady
ASTANA. KAZINFORM — Densaýlyq saqtaý mınıstrligi eldegi dári-dármek baǵasyn turaqtandyrý maqsatynda 20 óńirdegi dárihanalarǵa aýqymdy taldaý júrgizdi.
«Taýarlardy tańbalaý jáne qadaǵalaý» júıesi arqyly 2 635 dáriniń baǵasy salystyryldy. Nátıjesinde preparattardyń 49,5%-ynyń (1 309 ataý) baǵasy ózgerissiz qalsa, 20,4%-ynyń (669 ataý) baǵasy arzandaǵan.
Qazirgi ýaqytta naryqtaǵy 4 994 dárilik zattyń eń joǵarǵy baǵasy memleket tarapynan bekitilgen. Budan bólek, tegin medıtsınalyq kómek (TMKKK) pen mindetti saqtandyrý (MÁMS) júıesindegi 3 000-nan astam dári (sonyń ishinde áleýmettik mańyzy bar aýrýlarǵa arnalǵan túrleri) qosylǵan qun salyǵynan (QQS) bosatylǵan.
Mınıstrlik dári baǵasy negizsiz qymbattaǵan jaǵdaıda, azamattardy DariKZ mobıldi qosymshasy arqyly shaǵym túsirýge shaqyrady. Ol úshin taýarlyq chekti pen dári qaptamasyn sýretke túsirip jiberý qajet. Sondaı-aq bul qosymsha arqyly dáriniń janama áserleri týraly da habarlaýǵa bolady.
Eske salsaq, budan buryn dárilik zattardy basqarýda jańa tehnologııalar engizilip jatqanyn habarlaǵanbyz.
