6 jastan asqan balalar shetelge ata-anasyz usha alady
ASTANA. KAZINFORM – Qazaqstanda 6 jastan asqan balalar ata-anasyz nemese qamqorshysyz ushaqpen usha alady. Bul ishki jáne halyqaralyq reısterge de qatysty. Bul týraly Kólik mınıstrliginiń mamandary Kazinform tilshisiniń saýalyna bergen jaýabynda málimdedi.
– Qazaqstan Respýblıkasy Investıtsııalar jáne damý mınıstriniń 2015 jylǵy 30 sáýirdegi №540 buıryǵymen bekitilgen jolaýshylardy, bagajdy jáne júkterdi áýe kóligimen tasymaldaý qaǵıdalaryna sáıkes, kámeletke tolmaǵan jolaýshylar eresek jolaýshymen birge nemese onsyz da tasymaldana alady. Erip júretin adamdary joq kámeletke tolmaǵan jolaýshylar retinde ishki jáne halyqaralyq reısterde jasy 6-dan 16-ǵa deıingi ata-analarsyz jáne jolaýshylardyń qaısybirine senip tapsyrylmaǵan balalar tasymaldanady, – deıdi jaýaptylar.
Al 6 jasqa tolmaǵan jolaýshylar tek ata-anasymen, qamqorshysymen nemese kámelet jasqa tolǵan, senimhaty bar azamatpen birge usha alady. 6 jastan asqandar eresektersiz ushý úshin qandaı talaptardy oryndaý kerek? Mınıstrlik qyzmetkerleri jaýap berdi.
– Eger Qazaqstan Respýblıkasynyń kámeletke tolmaǵan azamaty elden eresek adamnyń ertýinsiz shyǵatyn bolsa, onda onyń pasportynan bólek, shyǵatyn merzimi men baratyn memleketi kórsetilgen, ata-anasynyń, asyrap alýshysynyń, qorǵanshysynyń nemese qamqorshysynyń notarıat kýálandyrǵan jazbasha kelisimi bolýy qajet. Áýe kompanııasy kámeletke tolmaǵan jolaýshyny eresek adamnyń ertýinsiz tek ata-anasy jazbasha ótinish bergen jaǵdaıda ǵana tasymaldaýǵa qabyldaıdy, – deıdi mamandar.
Alaıda 6 jastan asqan balalar táýliktiń túngi ýaqytynda jalǵyz usha almaıdy.
– «Qazaqstan Respýblıkasyndaǵy balanyń quqyqtary týraly» Zańnyń 36-babynyń 5-tarmaǵyna sáıkes, eresek adamsyz jol júretin kámeletke tolmaǵan balalar túngi saǵat 23:00-den tańǵy 06:00-ge deıingi ýaqytta ushaqqa otyrǵyzylmaıdy, – deıdi Qazaqstan Respýblıkasy Kólik mınıstrligi.
Aıta keteıik, kúni keshe Úndistanda ushaq apatqa ushyrap, 242 jolaýshydan tek 11A ornynda otyrǵan bir jolaýshy tiri qalǵan edi.
Odan bólek oqıǵa ornynda bolǵan taǵy 50 adam jaraqat alǵan.