Elimizde 6 jańa kásibı mereke paıda bolady

ASTANA. KAZINFORM — Premer-Mınıstrdiń orynbasary — Eńbek jáne halyqty áleýmettik qorǵaý mınıstriniń «Kásibı merekelerdiń tizbesin bekitý týraly» buıryǵyna ózgerister engiziledi. Qujat Ashyq NQA portalynda jarııalandy.

Buıryq jobasyna sáıkes, kásibı merekeler tizbesine Qazaqstan kásipkerleri kúni, Qazaqstannyń qolónershiler kúni, Tabıǵı monopolııalar salasy jumyskerleriniń kúni, Sanıtarııalyq-epıdemıologııalyq qyzmet jumyskeriniń kúni, Kadr qyzmeti jumyskerleriniń kúni, Qoǵamdyq tamaqtandyrý salasynyń jumyskeri kúni atty jańa kásibı merekeler engiziledi. Sondaı-aq Energetık kúnin merekeleý jeltoqsannyń úshinshi jeksenbisinen 22 jeltoqsanǵa ózgertiledi.

Eske sala keteıik, byltyr QR Eńbek jáne halyqty áleýmettik qorǵaý mınıstrligi vedomstvo basshysynyń 8 jańa kásibı merekeni bekitýdi kózdeıtin buıryǵynyń jobasy negiziginde elimizde jańa kásibı merekeler paıda bolǵan edi.

Atalǵan qujatqa saı:

– 28 qańtar – qarjylyq monıtorıngi organdarynyń kúni;

– shildeniń birinshi jeksenbisi – teńiz jáne ózen kóligi qyzmetkerleriniń kúni;

– tamyzdyń birinshi jeksenbisi – temirjol kóligi qyzmetkerleriniń kúni;

– qyrkúıektiń ekinshi jeksenbisi – baqylaý ólsheý aspaptary jáne avtomatıka salasy qyzmetkerleriniń kúni;

– 2 qazan – Qazaqstan Respýblıkasynyń tehnıkalyq jáne kásiptik, orta bilimnen keıingi bilim berý qyzmetkerleri kúni;

– qazannyń sońǵy jeksenbisi – avtomobıl kóligi qyzmetkerleriniń kúni;

– 10 qarasha – býhgalterlik esep jáne aýdıt salasy qyzmetkerleriniń kúni retinde usynyldy.

Aıta keteıik, Memleket basshysy Qasym-Jomart Toqaevtyń Jarlyǵymen 2025 jyl Jumysshy mamandyqtarynyń jyly dep jarııalandy.