Elimizde 6 myńnan astam mektep terrorıstik turǵyda osal — Oqý-aǵartý mınıstrligi
ASTANA. KAZINFORM — Elimizde 8 028 mektep jumys isteıdi. Olardyń ishinde 6 254 bilim ordasy terrorıstik turǵyda osal. Bul týraly Oqý-aǵartý mınıstrliginen málim etti.
Bilim jáne ǵylym mınıstriniń 2022 jylǵy 30 naýryzdaǵy buıryǵyna sáıkes, mektepterdegi terrorızmge qarsy qaýipsizdiktiń mindetti elementterine mynalar kiredi:
— kameralary ishki ister organdarynyń jedel basqarý ortalyqtaryna qosylǵan beınebaqylaý júıesi;
— dabyl túımelerin ornatý;
— lıtsenzııasy bar kúzet qyzmetimen kelisimshart jasasý;
— ǵımaratqa kirýdi baqylaý jáne basqarý júıelerimen qamtamasyz etý.
2025 jyldyń sońynda Oqý-aǵartý jáne Іshki ister mınıstrlikteri jergilikti atqarýshy organdarmen birlesip, barlyq mekteptiń terrorızmge qarsy qorǵanys talaptaryna is júzinde sáıkestigin teksergen.
— Ákimdikter men óńirlik polıtsııa departamentteriniń derekterine sáıkes, terrorızm turǵysynan osal obektiler sanatyna jatatyn mektepter 100 paıyz terrorızmge qarsy qorǵanys talaptaryna sáıkes keledi. Búginde terrorızm turǵysynan osal obektiler sanalatyn barlyq 6 254 mektep terrorızmge qarsy qaýipsizdik boıynsha belgilengen talaptarǵa sáıkes jabdyqtalǵan, — delingen vedomstvonyń agenttiktiń resmı saýalyna bergen jaýabynda.
Sonymen qatar mınıstrdiń buıryǵyna sáıkes, mektepterde ár jarty jylda keminde eki ret qyzmetkerlerdiń, pedagogter men oqýshylardyń qatysýymen tótenshe jaǵdaı qaýpi týyndaǵan kezdegi is-qımyldar boıynsha oqý-jattyǵýlar ótkiziledi.
Buǵan deıin mektepterdiń jańa oqý jylyna daıyndyǵyna baqylaý kúsheıtilgenin jazǵan edik.
