Elimizde 6 500 advokatqa suranys bar
ASTANA. KAZINFORM – Organdar men jumys berýshilerge bilim berý baǵdarlamalary mazmunyn ózgertýge ruqsat beriledi. Bul týraly Senatta ótip jatqan parlamenttik tyńdaýda Ǵylym jáne joǵary bilim mınıstri Saıasat Nurbek aıtty.
- Byltyrdan bastap 15 jańa oqý baǵdarlamasy engizildi. Olardyń ishinde tsıfrlyq krımınalıstıka, ІT-quqyq, ІT salasyndaǵy qylmystyq zań buzýshylyqtarǵa qarsy kúres, jasandy ıntellekt, tsıfrlandyrý syndy úrdisterge beıimdelgen baǵdarlamalar bar. Eńbek naryǵynyń naqty suranysyna jaýap berý úshin jaqsy jumys bastaldy. Qazirgi tańda 6,5 myńnan astam advokatqa suranys bar. Dosmuhambetov ýnıversıtetinde Atyraý oblystyq advokattar alqasynyń qoldaýymen alǵash ret bakalavrıat jáne magıstratýra deńgeıinde «advokattyq is» bilim baǵdarlamasy ázirlendi. Endi biz advokatýra, prokýratýra organdary JOO-larmen tikeleı jumys isteıdi. Oqý baǵdarlamalarynyń mazmunyn ózgertýge jumys berýshilerge jáne organdarǵa ruqsat beremiz. Memlekettik standart ózgerdi. JOO janynda osyndaı arnaıy ádisdemelik keńester qurylyp jatyr, - dedi ol.
Onyń atap ótýinshe, M Maqsut Narikbayev University-de bilim baǵdarlamasynyń salalyq uıymdar men qaýymdastyqtardyń kásibı akkredıtatsııasy engizildi.
- Endi oqý baǵdarlamasy tek qana mınıstrlik deńgeıinde akkredıtatsııadan ótpeı, syrttan táýelsiz kásibı qaýymdastyqtar – advokattar palatasy nemese jumys berýshiler qosymsha akkredıtatsııa beredi. Bul tájirıbe basqa JOO-larǵa da taratylýda. Bilim baǵdarlamasyn álemdik kontentpen tolyqtyrý maqsatynda 2023 jyldan bastap barlyq stýdentke Coursera platformasy qoljetimdi boldy. 4 200 kýrsty qazaq jáne orys tilderine aýdaryp berdik. Onyń ishinde zań salasynda eń sońǵy, myqty kýrstar da bar. Zań salasy boıynsha Coursera platformasynda 49 kýrsty 2 764 stýdent oqyp, 1 765 sertıfıkat aldy, - dedi Saıasat Nurbek.
Buǵan deıin Senat tóraǵasy Máýlen Áshimbaev zań salasyndaǵy mamandardyń sany bar da sapasy joq ekenin aıtqan bolatyn.
Al búginde bolashaq mamandardyń 97 paıyzy aqyly negizde bilim alyp jatyr.