Elimizde 5,8 mln qyzmetkerge jumys berýshiniń qosymsha zeınetaqy tólemderi tólendi
ASTANA. KAZINFORM – Qazaqstanda zeınetaqy júıesin jetildirý jumystary jalǵasyp jatyr. Jumys berýshiniń mindetti zeınetaqy jarnalary (JMZJ) qyzmetkerlerdiń áleýmettik qorǵalýyn arttyrýdyń mańyzdy quraly sanalady. Bul jarnalar qyzmetkerdiń jalaqysyn kemitpeı, tolyǵymen jumys berýshi tarapynan aýdarylady.
Eńbek jáne halyqty áleýmettik qorǵaý mınıstrliginiń málimetinshe, bul norma árbir jumys isteıtin azamattyń, ásirese jas urpaqtyń, senimdi qarjylyq qoryn qalyptastyrý maqsatynda engizildi.
Qazirgi ýaqytta zeınetaqy tólemderi úsh kózden qalyptasady: memlekettik bazalyq tólem, Biryńǵaı jınaqtaýshy zeınetaqy qory (BJZQ) shotyndaǵy jeke jınaqtar jáne jumys berýshiden keletin qosymsha jınaqtaýshy jarnalar.
Osy mehanızm qyzmetkerlerge ómir boıy qosymsha zeınetaqy tólemderin alýǵa múmkindik beredi. Bul ásirese 1975 jylǵy 1 qańtardan keıin týǵan azamattar úshin mańyzdy, sebebi olardyń zeınetaqy kapıtaly júıege turaqty aýdarymdar men qatysýdan táýeldi.
2026 jyldan bastap jumys berýshilerdiń jarna mólsheri qyzmetkerdiń tabysynyń 3,5%-yn quraıdy. Bul kórsetkish kezeń-kezeńimen ósip, 2028 jylǵa qaraı 5%-ǵa jetedi.
Júıeniń tıimdiligi bıylǵy jyly da baıqalyp otyr. 2026 jylǵy 1 sáýirdegi málimet boıynsha jumys berýshiler 5,8 mıllıon qyzmetkerge qosymsha zeınetaqy quqyǵyn qamtamasyz etti. Jyl basynan beri azamattardyń shottaryna 951 mıllıard teńge aýdarylǵan.
Sonymen birge memleket bıznes múddesin eskerip, salyq kodeksine sáıkes jumys berýshilerdiń JMZJ tóleýge jumsaǵan shyǵyndary korporatıvtik tabys salyǵyn eseptegende shegeriledi. Bul shara jumys berýshilerdi áleýmettik jaýapkershilikpen qaraýǵa jáne qyzmetkerlerdiń bolashaǵyna nazar aýdarýǵa yntalandyrady.
Eske sala keteıik, buǵan deıin Eńbek jáne halyqty áleýmettik qorǵaý mınıstrligi elimizdiń zeınetaqy júıesinde oryn alýy múmkin ózgeristerge qatysty pikir bildirgen edi.
