Elimizde 57 sý qoımasy salynady
TÚRKІSTAN. KAZINFORM - QR Sý resýrstary jáne ırrıgatsııa mınıstri Nurjan Nurjigitov Túrkistan oblysyna jumys saparymen kelip, sý sharýashylyǵynyń problemalary jáne sý únemdeý tehnologııasyn engizý máseleleri boıynsha májiliske qatysty.
Mınıstr birinshi kezekte sý únemdeıtin tehnologııalardy engizý jáne sýdy tutyný mádenıetin qalyptastyrý qajettigin atap ótti. Memleket bul úshin sýbsıdııa kólemin ulǵaıtýǵa jáne sýarmaly sýǵa tarıfti tómendetýge deıin barlyq jaǵdaıdy jasaıtynyn málimdedi.
Atalǵan saladaǵy máselelerdiń sheshilýine barynsha qoldaý kórsetiletinin aıtqan Nurjan Nurjigitov, óńirdegi sý únemdeý tehnologııasyn engizý jumystaryna oń baǵa berdi.
Sondaı-aq, mınıstrlik jumysynyń negizgi baǵyttary týraly aıtty. Máselen, Qazaqstan boıynsha jergilikti atqarýshy organdarmen birlesip 57 sý qoımasyn salý josparlanyp otyr, onyń 20-syn Sý resýrstary jáne ırrıgatsııa mınıstrligi salady. Sondaı-aq 133 gıdrotehnıkalyq qurylysty jáne 14 myń shaqyrymnan astam sýarý jelilerin jóndeý josparlanýda.
«Sýdyń kólemi endi kóbeımeıdi. Sondyqtan osy baǵytta jumystarǵa kúsh salynady. Elimizde sý sharýashylyǵy salasyn aýqymdy transformatsııalaý negizinen úsh baǵytta júrip jatyr. Birinshisi – sýdy únemdeý saıasatyn qalyptastyrýǵa, suranysty basqarýǵa, tazartylǵan sarqyndy sýdy qaıta paıdalanýǵa túbegeıli jańa normatıvtik-quqyqtyq baza qurý. Sodan soń, sý sharýashylyǵy ınfraqurylymyn jańartý, ozyq sý únemdeý tehnologııalaryn engizý, tsıfrlandyrý júıesin kúsheıtý. Sondaı-aq jańa tarıftik saıasat pen sý únemdeý mádenıetin engizý. Úshinshisi – kórshiles memlekettermen transshekaralyq yntymaqtastyqty kúsheıtý. Elimizdegi sý tapshylyǵy problemasyn sheshý úshin eki negizgi qujat – Sý kodeksi jáne Úkimet qabyldaǵan Sý resýrstaryn basqarý júıesin damytýdyń 2030 jylǵa deıingi tujyrymdamasy daıyndaldy. Sý kodeksiniń jańa redaktsııasynda sýdy sarqylýdan, lastanýdan qorǵaýǵa basymdyq beriledi. Sý salasyndaǵy jaýapkershilik zańnamalyq deńgeıde kúsheıtiledi», – dedi Nurjan Nurjigitov.
