Elimizde 5 myńǵa jýyq jetkinshek APV-ǵa qarsy vaktsına aldy
ASTANA. KAZINFORM – Búginde elimizde jatyr moıny obyrynyń aldyn alý maqsatynda adam papılloma vırýsyna (APV) qarsy vaktsınatsııa júrip jatyr.
«Búgin adam papılloma vırýsyna (APV) qarsy jetkinshek qyzdardy jalpy vaktsınalaýdyń ekonomıkalyq tıimdiligi jaǵyn talqyladyq. Sonymen qatar buǵan deıin osy vaktsınany engizgen elderdiń tájirıbesi men nátıjesin ortaǵa saldyq. Elimizde jatyr moıny obyrynyń negizgi qozdyrǵyshy – adam papılloma vırýsyna (APV) qarsy qyzdardy jalpy vaktsınalaý qyrkúıekte bastaldy. Búginde 11 men 13 jas aralyǵyndaǵy 5 myńǵa jýyq jetkinshek qyz ekpe aldy. Vaktsına salar aldynda jasóspirimniń ata-anasy jáne pedagogtarmen túsindirý jumystary júrgiziledi, sol sııaqty vaktsınany emhanadan bólek, mektep qabyrǵasynda alýǵa bolady», - dedi Qoǵamdyq densaýlyq saqtaý ulttyq ortalyǵynyń basqarma tóraǵasy Aıjan Esmaǵambetova APV-ǵa qarsy vaktsınatsııa júrgizý máselelerine arnalǵan semınarda.
Onyń aıtýynsha, jyl boıy el aýmaǵynda adam papılloma vırýsyna (APV) qarsy vaktsınatsııa naýqany bastalmas buryn ata-analar, pedagogtar jáne jetkinshek qyzdardyń arasynda aqparattandyrý, túsindirý jumystary júrgizilgen.
«Adam papılloma vırýsyna (APV) qarsy vaktsına – jatyr moıny obyrynyń aldyn alatyn jáne onymen kúresetin jalǵyz ekpe. Jyl saıyn jatyr moıny obyryna 2 myń adam (áıel) shaldyǵady, onyń 600-ge jýyq ólim tirkeledi», - dedi ol.
Aıta keteıik, búgin elordada APV-ǵa qarsy vaktsınatsııasyn júrgizýdiń qoǵamdyq densaýlyqqa áseri boıynsha zertteý nátıjelerine arnalǵan semınar ótti.
Atalǵan shara Dúnıejúzilik densaýlyq saqtaý uıymynyń Qazaqstandaǵy Eldik keńsesi QR Densaýlyq saqtaý mınıstrligimen jáne London gıgıena jáne tropıkalyq medıtsına mektebiniń uıytqy bolýymen ótti.
Eske salsaq, atalǵan qaýipti ınfektsııanyń taralý statıstıkasy qandaı, bul vırýs ne úshin qaýipti jáne nege ekpe alý qajettigine qatysty bizdiń agenttik sholý jasaǵan edi. Tolyǵyraq siltemege ótip, tanysýǵa bolady.
