Elimizde 5 855 BAQ jumys isteıdi

ASTANA. KAZINFORM – Mádenıet jáne aqparat mınıstrligi buqaralyq aqparat quraldary qyzmetkerlerin merekemen quttyqtady.

«Búgin – kún saıyn talmaı aqparat taratyp, mańyzdy máseleler kóterip, qoǵamdyq pikir qalyptastyratyn jáne qoǵamnyń damýyna zor úles qosyp júrgen jandardyń eńbegin erekshe atap ótetin kún. Jýrnalıstıka jaı ǵana kásip emes, qasterli mindet ári úlken jaýapkershilik. Sizderge júktelgen mindet kásibı biliktilikti, obektıvtilikti, adaldyq pen batyldyqty qajet etedi. Qanshama qıyndyqtar men syn-synaqtarǵa qaramastan, óz mindetterin abyroımen atqaryp, ádildik pen shyndyqtyń jolynda aıanbaı eńbek etip kele jatqan barsha BAQ ókilderi qashanda joǵary qurmetke laıyq», - delingen quttyqtaý mátininde.

Mınıstrliktiń málimetinshe, búginde Qazaqstanda jalpy baspa basylymdary, telearnalar, radıo jáne ınternet-resýrstardy qosqanda 5 855 BAQ tirkelgen.

«Sizderdiń jemisti jumystaryńyz elimizdiń aqparattyq keńistigin nyǵaıtýǵa jáne ashyq ári ádil qoǵam qurýǵa yqpal etedi. Jýrnalıst – buqara men bıliktiń arasyn jalǵaıtyn altyn kópir. Osy oraıda el múddesi úshin qajyrly qyzmet atqaryp júrgen barsha BAQ ókilderine erekshe alǵys bildiremiz», - dedi mınıstrlikten.

Buǵan deıin Memleket basshysy buqaralyq aqparat quraldary qyzmetkerlerin merekemen quttyqtaǵan bolatyn.