Elimizde 4,6 mıllıonnan astam geologııalyq derek tsıfrlanǵan - Úkimet
ASTANA. KAZINFORM – Búgin elordada taý-ken metallýrgııa salasyndaǵy eń iri halyqaralyq alańdardyń biri 16-Astana Mining & Metallurgy (AMM 2026) halyqaralyq taý-ken metallýrgııa kongresi ótip jatyr. Jıynda sóz alǵan QR Premer-mınıstri Oljas Bektenov Qazaqstanda 2026-2028 jyldary geologııalyq barlaý jumystaryna shamamen 470 mln dollar ınvestıtsııa salynatynyn aıtty.
Úkimet basshysynyń aıtýynsha, elimizde jer qoınaýyn keshendi zertteýge baǵyttalǵan aýqymdy baǵdarlama júzege asyrylyp jatyr. Onyń aıasynda Qazaqstan aýmaǵyn tolyq qamtıtyn zertteý jumystary qolǵa alynǵan. Jalpy qamtylatyn aýmaq kólemi 2 mln sharshy shaqyrymnan asady.
– Memleket basshysynyń tapsyrmasyna sáıkes, 2026-2028 jyldary geologııalyq barlaý jumystaryna memleket tarapynan shamamen 470 mln dollar ınvestıtsııa salynady. Bizdiń maqsatymyz – jer qoınaýynyń zerttelý deńgeıin arttyrý ǵana emes, zamanaýı tehnologııalarǵa, tsıfrlyq sheshimderge jáne halyqaralyq áriptestikke negizdelgen jańa geologııa salasyn qalyptastyrý, – dedi Oljas Bektenov.
Premer-mınıstrdiń aıtýynsha, jańa ken oryndaryn ashý bolashaq óndiristerdi iske qosýǵa, mıneraldyq-shıkizat bazasyn keńeıtýge jáne jańa ınvestıtsııalyq jobalardy júzege asyrýǵa jol ashady.
Sonymen qatar Úkimet basshysy salany tsıfrlandyrý jumystaryna da toqtaldy.
-Búginde 4,6 mıllıonnan astam geologııalyq derek tsıfrlandyrylǵan. Buryn qaǵaz qujattarda, fotosýretterde jáne eski tasymaldaǵyshtarda saqtalǵan aqparat endi elektrondy formatqa kóshirilgen, - dedi Úkimet basshysy.
Sondaı-aq Oljas Bektenov aldaǵy kezeńde jasandy ıntellekt tehnologııalaryn geologııalyq barlaýǵa, derekterdi taldaýǵa jáne óndiristik protsesterdi basqarýǵa engizý josparlanyp otyrǵanyn atap ótti.
Aıta keteıik, buǵan deıin Qazaqstan JI arqyly ken barlaý tıimdiligin arttyratynyn atap ótken edik.
