43 myń qazaqstandyqty aldaǵan mıkroqarjy uıymy áshkerelendi
ASTANA. KAZINFORM — Qazaqstanda «Ekspress Zaım» mıkroqarjy uıymynyń mıkrokredıt berý kezinde azamattardy jappaı aldaǵany áshkerelendi. Tergeý dereginshe, kompanııa qaryz alýshylarǵa aqyly keńes berý qyzmetin mindetti etip kórsetip, 43 myń azamatpen 181 myńnan astam shart jasasqan.
Qarjylyq monıtorıng agenttiginiń Qyzylorda oblysy boıynsha departamenti UQK departamentimen birlesip, prokýratýranyń úılestirýimen elimizdiń 18 óńirinde alaıaqtyq árekettiń jolyn kesti.
Tergeý málimetinshe, 2024 jyldyń tamyzynda «Ekspress Zaım» mıkroqarjy uıymy aqyly keńes berý qyzmetin engizgen. Onyń quny qaryz somasyna qaraı eseptelip, negizgi bereshekke qosylǵan.
Klıentterge qyzmet aqysyn tólemeıinshe mıkrokredıt ala almaıtyny nemese qaryzdy óteý merzimin uzarta almaıtyny aıtylǵan. Al bul qyzmetten bas tartýǵa bolatyny túsindirilmegen.
Osynyń saldarynan azamattar qolyna alýǵa tıis somadan az aqsha alǵanymen, qaryzdy syıaqysymen qosa tolyq qaıtarýǵa mindettelgen. Mıkrokredıtti óteý merzimi uzartylǵan saıyn aqyly keńes berý qyzmeti de qaıta rásimdelip otyrǵan.
Tergeý deregine sáıkes, 43 myń azamatpen osyndaı qyzmetke qatysty 181 myńnan astam shart jasalǵan.
Qazir mıkroqarjy uıymy dırektorynyń orynbasary úıqamaqqa alyndy. Tergeý jalǵasyp jatyr.
QR Qylmystyq-protsestik kodeksiniń 201-babyna sáıkes, tergeýdiń ózge málimetteri jarııa etilmeıdi.
Eske salaıyq, buǵan deıin Astanada satyp alýshylardy aldaǵan avtosalon dırektory sottalǵanyn habarlaǵan edik.
