Elimizde 40 mln tonnadan astam jemshóp daıyndaldy
ASTANA. KAZINFORM – Oblys ákimdikteriniń jedel málimetine sáıkes, aýyl sharýashylyǵy taýaryn óndirýshiler aldaǵy qysqy kezeńge 40 mln tonnadan astam jemshóp daıyndady. Bul josparlanǵan kólemniń 103,5 paıyzy.
Atap aıtqanda, 26,6 mln tonna shóp daıyndaldy, bul jospardyń 103,3 paıyzyna teń. Sonymen qatar 2,4 mln tonna pishendeme (102 paıyz), 2,5 mln tonna súrlem (89,2 paıyz), 4,6 mln tonna saban (96,2 paıyz) jáne 3,9 mln tonna qunarly jem daıyndaldy.
Jemshóptiń negizgi túrlerin daıyndaý josparynyń artyǵymen oryndalýy qosymsha saqtyq qorlaryn qalyptastyrýǵa múmkindik beredi. Bul aldaǵy qys mezgilinde aýa raıy qolaısyz bolǵan jaǵdaıda mal sharýashylyǵynyń turaqty jumys isteýine oń áser etedi.
Budan bólek, sharýashylyqtarda ótken qystan qalǵan 5,6 mln tonna jemshóp qory bar. Bul qor da maldyń qysqy azyǵyna qajettilikti óteýge jumsalady.
Aldaǵy qys kezeńinde aýyl sharýashylyǵy taýaryn óndirýshilerdi jemshóppen qosymsha qamtamasyz etý maqsatynda «Azyq-túlik kelisimshart korporatsııasy» AQ jemdik astyq qoryn qalyptastyrady. Qajet bolǵan jaǵdaıda bul qor mal sharýashylyǵy qojalyqtaryna qosymsha rezerv retinde paıdalanylatyn bolady.
Aýyl sharýashylyǵy mınıstrligi oblys ákimdikterimen birlesip, jemshóp daıyndaý naýqanynyń barysyn turaqty baqylaýda ustap otyrǵanyn habarlady. Bul jumys qajetti jemshóp qoryn der kezinde qalyptastyrýǵa, mal sharýashylyǵy qojalyqtaryn jetkilikti azyqpen qamtamasyz etýge jáne aldaǵy qys kezeńin oıdaǵydaı ótkizýge baǵyttalǵan.
Pavlodar óńirinde jemshóp qanshadan satylyp jatqanyn jazǵan edik.
