Elimizde 4 myńnan astam qoǵamdyq qurylym etnosaralyq qatynastardy nyǵaıtýǵa úles qosyp keledi
ASTANA. KAZINFORM – Búginde Qazaqstanda 100-den astam etnos ókilderi turady. El aýmaǵynda 1 000-nan astam etnomádenı birlestik pen 4 000-nan astam qoǵamdyq qurylym jumys isteıdi. Olardyń qatarynda volonterlik jáne jastar uıymdary, medıatsııa ınstıtýttary, ǵylymı-sarapshylyq qaýymdastyq pen buqaralyq aqparat quraldarynyń ókilderi bar. Bul týraly Mádenıet jáne aqparat mınıstrligi habarlady.
Osy aýqymdy jumysty qoldaý maqsatynda ınfraqurylymdy damytýǵa erekshe mán berilip otyr. Máselen, 2026 jyly Qyzylorda qalasynda jańa Dostyq úıi ashyldy. Qazirgi ýaqytta elimizde 36 Dostyq úıi jumys isteıdi. Onda etnomádenı birlestikterdiń tolyqqandy qyzmet júrgizýine barlyq qajetti jaǵdaı jasalǵan.
Alǵys aıtý kúni aıasynda respýblıka boıynsha 300-den astam is-shara uıymdastyryldy. Olardyń qatarynda «Alǵys estafetasy», saltanatty kezdesýler men qaıyrymdylyq aktsııalary bar. Negizgi is-sharalardyń biri Beıbitshilik jáne kelisim saraıynda ótken respýblıkalyq forým boldy.
Etnomádenı birlestikter «Taza Qazaqstan» jalpyulttyq jobasyn iske asyrýǵa da belsendi atsalysyp keledi. Olardyń 300 myńnan astam ókili elimizdiń barlyq óńirinde ekologııalyq aktsııalar men is-sharalarǵa turaqty negizde qatysady.
Eske sala keteıik, buǵan deıin qazaqstandyqtardyń 95%-dan astamy eldegi etnosaralyq qatynastardy turaqty dep sanaıtynyn jazǵan edik.
