Elimizde 4 myńǵa jýyq tazy tuqymy resmı tirkelgen
ASTANA. KAZINFORM – Elimizde 4 myńǵa jýyq tazy tuqymy resmı tirkelgen. Biraq, onyń sany munan da kóp bolýy múmkin. Bul týraly BIZDIÑ ORTA podkastynda qonaq bolǵan Qazaqstan Kınologtar odaǵynyń prezıdenti Baýyrjan Serikqalı aıtty.
Baýyrjan Serikqalıdiń aıtýynsha, Qazaqstan Kınologtary odaǵynyń resmı asyl tuqymdy ıtter kitabyna tórt myńǵa jýyq tazy engizilgen. Bul — qajetti irikteýden, veterınarııalyq tekserýlerden ótip sáıkestendirilgen jáne shyǵý tegin rastaıtyn qujaty, ıaǵnı shejiresi rásimdelgen tazylar.
Sonymen qatar tazynyń edáýir bóligi áli de resmı esepke alynbaı otyr.
— Aýyldarda osynaý esepke alý rásiminen áli ótpegen ıt óte kóp. Sondyqtan biz eldi mekenderdi aralap, asyl tuqymdy ıtterdi baıqaýdan ótkizý, arnaıy ekspedıtsııalar uıymdastyrý kezinde osyndaı ıtterdi anyqtaımyz. Eger olardyń tuqymdyq qundylyǵy bolsa, onda ıesimen ári qaraı jumys isteımiz, — dedi Baýyrjan Serikqalı.
Kınologtar ıelerine mundaı asyl tuqymdy ıtterin esepke engizýge kómektesip, olardyń urpaǵyn saqtaý jáne tirkeý úshin qandaı rásimderden ótý qajettigin túsindiredi.
— Bul baza qalaı degende de arta beredi. Tórt myń — bul resmı san, — dep atap ótti sarapshy.
Osyǵan deıin sheteldik sarapshylardy qazaqy tazynyń qaı qasıeti qyzyqtyratyny týraly jazdyq.
