Elimizde 3D-basyp shyǵarý boıynsha jańa standart bekitildi
ASTANA. KAZINFORM — Qazaqstanda ónerkásiptik 3D-basyp shyǵarýdy damytýǵa arnalǵan ulttyq standart bekitildi. Qujat shıkizat pen daıyn bólshekterdiń negizgi sıpattamalaryn jáne olardy synaý ádisterin belgileıdi. Jańa standart 2027 jylǵy 1 qańtardan bastap qoldanysqa engiziledi.
Saýda jáne ıntegratsııa mınıstrliginiń habarlaýynsha, «QR ST ISO/ASTM 52927-2026» «Addıtıvti tehnologııalar. Jalpy qaǵıdattar. Negizgi sıpattamalar jáne synaý ádisteri» ulttyq standartyn «QazStandart» respýblıkalyq memlekettik kásiporny ázirledi. Qujatty Qazaqstan Respýblıkasy Saýda jáne ıntegratsııa mınıstrligi Tehnıkalyq retteý jáne metrologııa komıteti tóraǵasynyń 2026 jylǵy 25 qyrkúıektegi № 46-NQ buıryǵymen bekitti.
Jańa standart kásiporyndarǵa qosalqy bólshekterdi, qural-jabdyqtar men jabdyq quramdastaryn Qazaqstannyń ózinde óndirýge múmkindik beretin normatıvtik negiz qalyptastyrady. Bul sheteldik jetkizilimderge táýeldilikti azaıtýǵa jol ashady. Tehnologııa munaı-gaz, taý-ken ónerkásibi, energetıka, mashına jasaý jáne kólik salalary úshin mańyzdy.
Standartty engizý kásiporyndarǵa «tsıfrlyq qoımalar» qurýǵa múmkindik beredi. Sırek qoldanylatyn bólshekterdi kóp mólsherde saqtaýdyń ornyna, olar sertıfıkattalǵan 3D-modelderdi saqtap, qajetti bólshekterdi suranys týǵan kezde basyp shyǵara alady. Bul, ásirese shalǵaıdaǵy nysandarda, saqtaý jáne jetkizý shyǵyndaryn azaıtýǵa kómektesedi.
Keri jobalaý men 3D-basyp shyǵarýdy qoldaný bólshekterdi daıyndaý jáne jóndeý merzimin birneshe aıdan birneshe kúnge deıin qysqartýy múmkin. Sonyń arqasynda jabdyqty jumysqa tezirek qaıtarýǵa bolady. Addıtıvti tehnologııalar kúrdeli pishindegi bólshekter men jeńil konstrýktsııalar jasaýǵa, sondaı-aq óndiris qaldyqtaryn barynsha azaıtýǵa múmkindik beredi.
Ulttyq 3D-modelder qory qalyptasýy múmkin
Standart 3D-modelder men tehnologııalyq derekterdiń ulttyq qoryn qalyptastyrýǵa negiz bolady. Bul asa mańyzdy buıymdardy otandyq óndiriste jasaýǵa, sondaı-aq jobalaý, materıaldar ázirleý, ónim óndirý jáne ony sertıfıkattaý baǵyttaryndaǵy ulttyq quzyretterdi damytýǵa qajet.
Biryńǵaı normatıvtik baza 3D-prınterlerdi jekelegen maqsattarda paıdalanýdan tolyqqandy óndiris salasyn damytýǵa kóshýge yqpal etýge tıis. Bul shaǵyn ınjenerlik jáne óndiristik kásiporyndarǵa, servıstik ortalyqtar men mamandandyrylǵan 3D-bıýrolarǵa jańa múmkindikter ashady.
Ýnıversıtetter men ǵylymı-zertteý ınstıtýttary úshin standart metall untaqtarymen, polımerlermen, kompozıttermen jáne daıyn bólshektermen jumys isteýdiń biryńǵaı ádisnamasyn belgileıdi. Bul ǵylymı ázirlemelerdi óndiriske engizýge kómektesedi. Qujat synaq zerthanalary men sáıkestikti baǵalaý organdarynyń jumysyna da negiz bolady.
Salanyń damýy 3D-modeldeý mamandaryna, addıtıvti óndiris ınjenerlerine, materıaltanýshylarǵa jáne sapany baqylaý sarapshylaryna degen suranysty arttyrýy múmkin.
Eske salaıyq, buǵan deıin Qazaqstanda turǵyn úı sapasynyń biryńǵaı standartyn engizý usynylǵanyn habarlaǵanbyz.
