Elimizde 350 myń adam qumar oıyndy júıeli túrde oınaıdy

ASTANA. KAZINFORM — Týrızm jáne sport vıtse-mınıstri Erjan Erkinbaev elimizde mıllıon lýdoman bar degen aqparatty joqqa shyǵardy. 

— Bizdiń derekter boıynsha, 350 myń azamat júıeli túrde oınaıdy, bul olardyń barlyǵy lýdoman degendi bildirmeıdi. Densaýlyq saqtaý mınıstrligimen birlesken zertteýlerimizge sáıkes, quzyrly vedomstvonyń anyqtamasy boıynsha 36 myń adam lýdoman, ıaǵnı táýeldi. Biz halyqaralyq tájirıbeni de zerttedik jáne júıeli túrde oınaıtyndardyń shamamen 10%-y táýeldi ekenin anyqtadyq. Kóptegen elde osy kórsetkish, bizde de sol shama. Al bizdiń elde mıllıon lýdoman bar degen málimetter rastalmady, shyndyqqa janaspaıdy, — dedi Erjan Erkinbaev Senat qabyrǵasynda ótken is-shara barysynda.

Vıtse-mınıstr usynǵan málimetke súıensek, lýdomanııamen kúresý maqsatynda ótken jyly shildede de oıyn bıznesi men lotereıa boıynsha zańnamalarǵa túzetýler engizildi.

Jalpy 8 kodeks pen 14 zańǵa 150-ge jýyq túzetý engizildi, atap aıtqanda:

• býkmekerler jarnamasyna shekteý qoıý;

• memlekettik qyzmetshi men qaryzy bar adamdardyń qumar oıyndarǵa qatysýyna tyıym salý;

• 21 jasqa tolmaǵan azamattarǵa shekteý qoıý;

• oıyn bıznesi sýbektilerin jaýapkershilikke tartý;

• onlaın-kazınolar tranzaktsııalaryn buǵattaý.

— Shilde men qyrkúıek aralyǵynda zańnyń jańa normalaryn túsindirý boıynsha jumys júrgizildi. Jarty jyldyń ózinde baǵyttyń durys ekeni baıqalyp, nátıjesin berip jatyr, — deıdi ol.

Buǵan deıin habarlaǵanymyzdaı elimizde qumar oıynǵa áýes memlekettik qyzmetkerlerdi avtomatty túrde anyqtaıtyn arnaıy júıe ázirlenip jatyr. 

Aıta keteıik, búgin Senattyń Áleýmettik-mádenı damý jáne ǵylym komıtetiniń depýtattary oıyn bıznesi jáne elimizde lotereıaǵa qatysty qabyldanǵan zańnamaǵa engizilgen ózgeristerdi iske asyrý barysyn talqylady.

Eske sala ketsek, qazaqstandyqtar ózin 10 jylǵa deıin qumar oıyndardan shekteı alady.