Elimizde 3300-den astam máslıhat depýtaty bar

ASTANA. KAZINFORM – Búgin elordada Senat janyndaǵy máslıhattarmen ózara is-qımyl jónindegi keńestiń keńeıtilgen otyrysy ótip jatyr.

- Búgin biz Máslıhattarmen ózara is-qımyl jónindegi keńestiń keńeıtilgen otyrysyna jınalyp otyrmyz. Senat janyndaǵy bul konsýltatıvtik-keńesshi organnyń qurylǵanyna bıyl on jeti jyl tolyp otyr. Osy ýaqyttyń ishinde atalǵan alań Parlament pen máslıhattardyń birlesken jumysynyń mańyzdy ári tıimdi tetigine aınaldy. Osy oraıda Keńes jumysy Qasym-Jomart Kemeluly Toqaevtyń bastamasymen qolǵa alynǵanyn atap ótken jón. Jalpy, búgingi is-shara máslıhattardyń memlekettik jáne jergilikti ózin ózi basqarý júıesindegi rólin talqylaýǵa arnalyp otyr. Sonyń aıasynda máslıhattardyń jańa kezeńdegi basymdyqtaryna jan-jaqty ári tereńirek toqtalamyz. Osyǵan baılanysty jıynǵa Parlament pen máslıhattardyń depýtattary, Úkimet músheleri, ortalyq jáne jergilikti atqarý organdarynyń ókilderi qatysyp otyr, - dedi Senat tóraǵasy Máýlen Áshimbaev.

Palata spıkeri elimizdegi máslıhattardyń róli jaıynda pikir aıtty. 2022 jylǵy konstıtýtsııalyq reformalardyń aıasynda máslıhattardyń derbestigin nyǵaıtý arnalǵan júıeli sharalar qabyldandy. Sonyń nátıjesinde olardyń ınstıtýtsıonaldyq jáne saıası quzyreti keńeıdi. Sondaı-aq, máslıhat tóraǵasy degen laýazym engizildi, oblys ákimderin máslıhattardyń qatysýymen taǵaıyndaý tártibi ózgerdi. Saılaý júıesi de reformalandy. Qazirgi tańda máslıhattar jergilikti bıýdjetti bekitedi jáne onyń oryndalýyn baqylaıdy.

Jergilikti atqarýshy organdardyń qyzmetine monıtorıng júrgizedi. Sonymen qatar, máslıhattar elimizdiń Parlament Senatyn jasaqtaıtynyn aıryqsha atap ótken jón.

- Jalpy, máslıhattar 30 jyldan astam tarıhy bar irgeli ınstıtýt ekeni belgili. Osy jyldar ishinde bul organ formaldy qurylymnan bılik júıesiniń jergilikti jerdegi tolyqqandy sýbektisine aınaldy. Qazirgi tańda elimizde 3300-den astam máslıhat depýtaty bar. Olardyń bári saılaýshylardyń múddesin qorǵaı otyryp, memleket pen halyq arasyndaǵy altyn kópirge aınaldy dep aıtýǵa tolyq negiz bar. Memleket basshysy qolǵa alǵan sońǵy saıası reformalardyń arqasynda osy jyldarda máslıhattardyń róli aıtarlyqtaı nyǵaıdy. Bul ózgerister «Kúshti Prezıdent – Yqpaldy Parlament – Esep beretin Úkimet» atty memlekettik qurylystyń jańa formýlasyna sáıkes júzege asyryldy. Prezıdentimiz Qasym-Jomart Kemeluly Toqaev myzǵymaıtyn osy úsh taǵannyń taǵy bir belgisi – jaýapty jergilikti basqarý ekenin talaı márte aıtqan bolatyn. Sondyqtan atalǵan qaǵıdat aıasynda máslıhattarǵa mańyzdy mindet júkteletini sózsiz, - dedi M. Áshimbaev.

Budan buryn habarlanǵandaı, búgin Senat janyndaǵy máslıhattarmen ózara is-qımyl jónindegi keńestiń otyrysynda Premer-Mınıstrdiń orynbasary Ermek Kósherbaev birneshe tólem túri aýyl bıýdjetiniń paıdasyna aýdarylatynyn aıtty.