Elimizde 32 tehnologııa men ınnovatsııalardy qoldaý ortalyǵy jumys isteıdi

ASTANA. KAZINFORM - Elimizde 32 tehnologııa men ınnovatsııalardy qoldaý ortalyǵy jumys isteıdi. Bundaı ortalyqtar qyzmeti óńirlerde ınnovatsııalyq kásipkerlikti damytýǵa baǵyttalǵan. Bul týraly QR Ádilet vıtse-mınıstri Botagóz Jaqselekova aıtty.

— Innovatsııalyq ekojúıeni damytýda jáne ınnovatsııalar men shyǵarmashylyqty damytý úshin qolaıly orta qurýda tehnologııalar men ınnovatsııalardy qoldaý ortalyqtary (TMQO) mańyzdy ról atqarady.

Búgingi tańda Qazaqstanda elimizdiń 18 óńirin qamtıtyn ýnıversıtetter bazasynda osyndaı 32 ortalyq jumys isteıdi.

TMQO qyzmeti óńirlerde ınnovatsııalyq kásipkerlikti damytýǵa baǵyttalǵan. Olar sharýashylyq júrgizýshi sýbektilerge ónertabystarǵa, paıdaly modelderge jáne basqa da ónerkásiptik menshik obektilerine quqyqtyq qorǵaýdy resimdeý boıynsha resýrstar men daǵdylardy usynady, - dedi ol OKQ alańynda.

Vıtse-mınıstr, sondaı-aq, 3-4 jeltoqsanda Astana qalasynda Dúnıejúzilik zııatkerlik menshik uıymymen birlesip uıymdastyrylǵan TMQO-ny damytý jónindegi óńirlik konferentsııa ótkenin atap ótti.

— Bul is-shara tájirıbe almasý jáne zııatkerlik menshik salasyndaǵy halyqaralyq yntymaqtastyqty nyǵaıtý úshin strategııalyq mańyzǵa ıe, sondaı-aq óńirde ornyqty ınnovatsııalyq damý úshin jaǵdaı jasaýǵa yqpal etedi. Biz kelesi jyly TMQO-ny ulǵaıtý boıynsha jumysty jalǵastyramyz, - dedi Botagóz Jaqselekova.

Aıta keteıik, buǵan deıin Qazaqstan zańnamasyna jańa «geografııalyq nusqama» zııatkerlik menshik obektisi engizilgenin, ony ónim shyǵarýshylar qalaı utymdy paıdalana alatynyn jazǵan edik.