Elimizde 30,5 myńnan asa nysan ınklıýzıvti talaptarǵa saı jabdyqtaldy
ASTANA. KAZINFORM — 2026 jyldyń sońyna deıin respýblıka boıynsha 34 318 nysandy beıimdeý kózdelgen, dep habarlaıdy Eńbek jáne halyqty áleýmettik qorǵaý mınıstrliginiń baspasóz qyzmeti.
Qazaqstanda múgedektigi bar adamdar úshin áleýmettik ınfraqurylym nysandarynyń qoljetimdiligin qamtamasyz etý jáne kedergisiz orta qalyptastyrý baǵytyndaǵy jumystar júıeli túrde jalǵasyp keledi.
Qazir bul baǵytta 2025-2030 jyldarǵa arnalǵan Qazaqstan Respýblıkasynyń ınklıýzıvti saıasat tujyrymdamasy, 2023–2027 jyldarǵa arnalǵan Jol kartasy jáne «Halyqpen birge» jobasy iske asyrylady.
Jol kartasy aıasynda Qoljetimdiliktiń ınteraktıvti kartasyna (Karta) engizilgen 42 myńnan astam nysandy beıimdeý kózdelgen. Jumystar kezeń-kezeńimen júrgizilýde: jyl saıyn nysandardyń keminde 20%-y beıimdelýi tıis. Osylaısha, 2023 jyly Kartadaǵy nysandardyń 20%-y, 2024 jyly — 40%-y, 2025 jyly — 60%-y, 2026 jyly — 80%-y, al 2027 jyly 100%-y tolyq beıimdelýi josparlanǵan.
2026 jyldyń sońyna deıin respýblıka boıynsha 34 318 nysandy beıimdeý kózdelgen. 2026 jylǵy 15 maýsymdaǵy jaǵdaı boıynsha 30 571 nysan tolyq beıimdelip, josparlanǵan kórsetkishtiń 71%-yn qurady.
Beıimdelgen nysandardyń ishinde:
- densaýlyq saqtaý uıymdary — 5 020;
- bilim berý uıymdary — 9 574;
- mádenıet nysandary — 2 257;
- saýda jáne qyzmet kórsetý nysandary — 6 369;
- memlekettik jáne kvazımemlekettik uıymdar — 4 222;
- ózge de nysandar — 3 129.
— Eń kóp beıimdelgen nysandar Almaty qalasynda (6 189 nysan), Túrkistan (2 512 nysan), Qyzylorda (1 887 nysan) oblystarynda, Shymkent qalasynda (1 623 nysan), Atyraý oblysynda (1 559 nysan) jáne Astana qalasynda (1 456 nysan) ornalasqan, — delingen habarlamada.
Júrgizilip jatqan jumystar múgedektigi bar adamdardyń áleýmettik ınfraqurylym nysandaryna kedergisiz qol jetkizýin qamtamasyz etýge baǵyttalǵan. Nysandardy beıimdeý kezinde kireberistiń qoljetimdiligine, sanıtarııalyq-gıgıenalyq bólmelerge, navıgatsııa júıesine, sondaı-aq azamattardyń barlyq sanaty úshin qaýipsiz ári derbes qozǵalýyna jaǵdaı jasaýǵa erekshe nazar aýdarylady.
Múgedektigi bar azamattardyń pikirinshe, júzege asyrylyp jatqan sharalar olardyń ómir súrý sapasyn arttyryp, qoǵamdyq ómirge belsendi aralasýyna jańa múmkindikter ashýda.
— Jyl saıyn kedergisiz orta aıasy keńeıip keledi jáne bul bizdiń ómir sapamyzǵa tikeleı áser etedi. Ásirese qoǵamnyń kózqarasy ózgerip jatqany qýantady: kásipkerler men nysan ıeleri ınklıýzııanyń shynaıy mańyzyn túsine bastady. Óıtkeni qoljetimdi orta — eń aldymen bizdiń táýelsizdigimiz, — deıdi birinshi toptaǵy múgedektigi bar Dastan Raýshanbekov.
Qoljetimdi orta qalyptastyrý jumystary memlekettik ınklıýzıvti saıasat aıasynda belgilengen josparlarǵa sáıkes elimizdiń barlyq óńirinde jalǵasatyn bolady.
Buǵan deıin júktiligi úzilip, múgedektik alǵan áıel aýrýhanadan 5 mln teńge óndirip alǵanyn jazǵan edik.
