Elimizde 286 mýzeı jumys isteıdi — Balaeva
ASTANA. KAZINFORM – Premer-Mınıstrdiń orynbasary – Mádenıet jáne aqparat mınıstri Aıda Balaeva mýzeı kúnimen quttqtady.
— Sizderdi Halyqaralyq mýzeıler kúnimen shyn júrekten quttyqtaımyn! Mýzeı — ótkendi búginmen jalǵaıtyn, tarıh taǵylymy óskeleń urpaqtyń tanymyna jol ashatyn kıeli keńistik. Mýzeıde ótken tarıhty jaqynnan tanyp, halqymyzdyń mádenıeti men rýhanı murasyn tereńirek sezinýge bolady. Árbir túpnusqa jádiger, qundy qujat, óner týyndysy men arheologııalyq olja — el tarıhynyń, adam taǵdyrynyń, urpaqtar sabaqtastyǵynyń bir bólshegi. Osy qundylyqtar arqyly ulttyq mura keler urpaqqa amanat bolyp jetedi, — dedi Aıda Balaeva.
Elimizde 286 mýzeı jumys isteıdi. Olardyń qorynda 4,5 mıllıonnan astam jádiger saqtalǵan, al mýzeılerge jyl saıyn 6,5 mıllıonnan astam adam keledi
— Búginde Qazaqstannyń mýzeı salasy — aýqymdy ári qarqyndy damyp kele jatqan júıe. Elimizde 286 mýzeı jumys isteıdi. Olardyń qorynda 4,5 mıllıonnan astam jádiger saqtalǵan, al mýzeılerge jyl saıyn 6,5 mıllıonnan astam adam keledi. Bul sandardyń artynda kórmelerge degen qyzyǵýshylyq qana emes, qoǵamnyń óz tarıhyn tanyp-bilýge, mádenı sabaqtastyqty saqtaýǵa degen tereń suranysy tur.
Memleket basshysynyń bastamasymen tarıhı sanany jańǵyrtýǵa, mádenı murany saqtaýǵa jáne ony bolashaq urpaqqa jetkizýge aıryqsha kóńil bólinip keledi. Jańa Konstıtýtsııamyzdyń qundylyqtar júıesinde mádenıet, bilim, ǵylym jáne ınnovatsııa adam kapıtalyn damytý men jasampaz qoǵam qalyptastyrýdyń mańyzdy negizderi retinde erekshe mánge ıe boldy. Sondyqtan qazirgi mýzeı — murany saqtaıtyn oryn ǵana emes, tárbıe, aǵartý jáne ulttyq bolmysty nyǵaıtý isiniń mańyzdy arqaýy, — dedi ol.
Ol mýzeı salasyn tsıfrlandyrýdyń mańyzy erekshe ekenin aıtty.
— Búginde mýzeıler ǵylymı-zertteý, bilim berý jáne aǵartýshylyq baǵyttaǵy zamanaýı ortalyqtarǵa aınalyp keledi. Tek ótken jyldyń ózinde respýblıkalyq mýzeıler 1,5 myńnan astam is-shara uıymdastyrdy. Onyń ishinde 187 kórme ótip, olardy 800 myńǵa jýyq adam tamashalady. Almatydaǵy Ulttyq ortalyq mýzeıde «Altyn Orda» zaly ashylyp, «Qazaqstannyń Táýelsizdigi» zalynyń reekspozıtsııasy júrgizildi. Mundaı jobalar Qazaqstan tarıhynyń mańyzdy kezeńderin jańasha tanytyp, onyń mazmunyn tereńirek ashýǵa múmkindik beredi.
Mýzeı salasyn tsıfrlandyrýdyń da mańyzy erekshe. Bul jumys mýzeılermen qatar mýzeı-qoryqtarda da júıeli túrde júzege asyp jatyr. Qazirdiń ózinde kelýshilerge yńǵaıly ári zamanaýı qyzmet kórsetýge múmkindik beretin elektrondy kirý júıesi engizildi. Sonymen birge E-museum biryńǵaı tsıfrlyq keńistigi damyp keledi. Bul júıege elimizdiń barlyq 20 óńirinen 284 mýzeı qosyldy. Tsıfrlyq katalogqa mýzeı qorynyń 66 myńnan astam birligi engizilip, 750 úshólshemdi model jasaldy, 15 vırtýaldy týr qoljetimdi boldy.
Búgin keshke elimizdiń barlyq óńirinde dástúrli «Mýzeıler túni» aktsııasy ótedi. Qazaqstannyń mýzeıleri men mýzeı-qoryqtary kelýshilerge esigin erekshe formatta ashyp, keshki ekskýrsııalar, kórmeler, ınteraktıvti baǵdarlamalar, shyǵarmashylyq kezdesýler men mádenı-aǵartýshylyq is-sharalar usynady.
Barsha mýzeı qyzmetkerlerine kásibine adaldyǵy, ulttyq muraǵa degen janashyrlyǵy jáne qoǵamnyń rýhanı órkendeýine qosyp kele jatqan zor úlesi úshin shynaıy alǵysymdy bildiremin, — dedi Aıda Balaeva.
Aıta ketelik almatylyqtar 18 mamyrda mádenı nysandardy tegin aralaı alady.
