Elimizde 27 mln gektar jaıylym jaramsyz kúıge túsken

ASTANA. KAZINFORM – Elimizde 30 mln gektar alqap tabıǵattyń áserinen tozsa, 27 mln gektar alqap mal aıaǵymen taptalǵan. Bul týraly Aýyl sharýashylyǵy mınıstrligi Jer resýrstaryn basqarý komıtetiniń tóraǵasy – Jerdi paıdalaný men qorǵaý jónindegi bas memlekettik ınspektory Murat Temirjanov ortalyq kommýnıkatsııalar qyzmetinde ótken baspasóz máslıhatynda málim etti.

- Qazirgi tańda shamamen 30 mln gektar jer degradatsııaǵa ushyraǵan. Onyń ishinde 5 mln gektar jer sý erozııasyna, 25 mln gektar jer jel erozııasyna ushyraǵan. Sonymen qatar elimizde 27 mln gektar taptalǵan jaıylym bar, - dedi ol.

Onyń sózinshe, 205 mln gektar jerde tsıfrlyq karta jasaý jumystary aıaqtalǵan.

- Bul kartalar aýyl sharýashylyǵy alqaptarynyń keńistiktegi ornalasýy, kólemi jáne sapalyq jaǵdaıy týraly obektıvti aqparatty kórsetedi, - dedi Murat Temirjanov.

Aıta ketý kerek, burynǵy Aýyl sharýashylyǵy mınıstri Erbol Qarashókeev Qazaqstanda jer paıdalanýshylardyń nemquraılyǵynan 90 mln gektar aýmaq erozııaǵa ushyraǵanyn aıtqan edi. Onyń 29,3 mln gektary iske jaramsyz kúıge túsken.