Elimizde 27 myńnan astam kamera jasandy ıntellekt elementterimen qamtylǵan – ІІM

ASTANA. KAZINFORM – Qazaqstannyń quqyq qorǵaý júıesi tsıfrlandyrýdyń jańa deńgeıine kóshti. Búginde elimiz boıynsha 1,6 mıllıonnan astam beınebaqylaý kamerasy jumys istese, onyń edáýir bóligi jasandy ıntellekt tehnologııasymen jabdyqtalǵan.

ІІM Baspasóz hatshysy Shuǵyla Turlybek Jibek Joly telearnasynyń Búgin.LIVE baǵdarlamasynda «aqyldy» kameralardyń zańbuzýshylyqtardy qalaı anyqtaıtyny jáne olardyń adam ómirine tıgizer áseri týraly mańyzdy derektermen bólisti.

Qazirgi tańda polıtsııanyń Jedel basqarý ortalyqtaryna 90 myńǵa jýyq kamera qosylyp, ınspektorlar táýlik boıy monıtorıng júrgizedi. Onyń ishinde 27 myń kamera jaı ǵana túsirip qoımaı, derekterdi ózdiginen taldaı alatyn qabiletke ıe.

Bul tehnologııanyń basty baǵyty – jol qaýipsizdigi.

ІІM ókiliniń aıtýynsha, JI elementteri bar kameralar avtokóliktiń memlekettik tirkeý nómirin tanýdan bólek, júrgizýshiniń is-áreketin de baqylaıdy.

– Búgingi tańda JI elementteri bar kameralar basym jaǵdaıda jol qaýipsizdigi salasynda qoldanylady. Memlekettik tirkeý nómiri arqyly avtokólikti anyqtaý, qaýipsizdik belbeýin taqqan-taqpaǵanyn bilý, telefon qoldaný degen sııaqty derekterdi anyqtaıdy, – deıdi Shuǵyla Turlybek.

Buryn zańbuzýshylyqtardy negizinen ınspektorlar ózderi anyqtasa, endi júıe belgi beredi. Aldaǵy ýaqytta jasandy ıntellekt adamdar kóp jınalǵan jerlerdi baqylap, tipti qarý ustaý deregin de aldyn ala anyqtaıtyn bolady.

Qoǵamda beınebaqylaý júıesine qatysty ár adamdy ańdıdy degen qaýesetter jıi aıtylady. Alaıda ІІM ókili bul júıeniń maqsatyn túsindirip, qaýipsizdik kepildigin atap ótti.

– Bul kameralar buryn esepte turǵan, qylmys jasap, jaýapqa tartylǵan nemese izdeýde júrgen, jaýapkershilikten jaltarýǵa tyrysatyn azamattardy anyqtaıdy. Al meni bireýmen shatastyryp alady degen nárse – mıf, – dep túıindedi baspasóz hatshysy.

Aıta keteıik, «aqyldy kameralar» qandaı zań buzýdy anyqtaıtynyn jazǵan edik.