Elimizde 25 myń shaqyrym jol qysqy kútimmen qamtylǵan
Qysqy kútimmen qamtylǵan avtojoldardyń jalpy uzyndyǵy halyqaralyq jáne respýblıkalyq tas joldardy qosa alǵanda 25 myń shaqyrymdy quraıdy, dep habarlaıdy Kazinform.
Atalǵan kólemniń 21 myń shaqyrymyna «KAJservıs» JShS kúshteri, al taǵy 4 myń shaqyrymyna rekonstrýktsııalaý jáne kúrdeli jóndeý obektilerinde merdigerlik uıymdar qyzmet kórsetedi.
«Qysqy kútimdi qamtamasyz etý úshin 1033 birlik qar tazalaý tehnıkasy jumyldyrylǵan, sondaı-aq qysqy jaǵdaılarda senimdilik pen tıimdilikti qamtamasyz etý úshin shamamen 218 birlik qosymsha tehnıka jalǵa alyndy.
Búgingi tańda 515 óndiristik baza saqadaı saı, onyń ishinde jylytý pýnktteri, qazandyqtar, garajdar, avtoturaqtar men qoımalar paıdalanýǵa daıyn», — dep jazdy Kólik mınıstrligi.
Elimiz boıynsha barlyq qajetti jabdyqtarmen qamtylǵan 121 jylytý pýnkti bar. Qıyn jaǵdaıǵa tap bolǵan paıdalanýshylar úshin alǵashqy baspana. Bul pýnktter ózderiniń as úıimen, paıdalanýshylarǵa arnalǵan demalys bólmelerimen jáne kólikke arnalǵan jyly bokstarmen jabdyqtalǵan.
«Sondyqtan jolda „jol-paıdalaný ýchaskesi“ degen jazýy bar mańdaıshalardy qadaǵalaýǵa keńes beremiz.
Qysqy kútimniń ajyramas bóligi kóktaıǵaqqa qarsy materıaldardy daıyndaý bolyp tabylady. Qazirgi ýaqytta 26 myń tonna tuz, 94 myń m3 qum, 33 myń m3 untaq, 778 tonna reagent jáne 25 myń m3 qum-tuz qospasy bar», — delingen habarlamada.
Aǵashtardy kesý, shópterdi shabý, «jyldamdyqty shekteý», «taıǵaq jol» ýaqytsha jol belgilerin jáne qardan qorǵaý qalqandaryn ornatý jumystary jalǵasýda. Qarly ýchaskelerdiń jalpy uzyndyǵy 2,5 myń shaqyrymdy quraıdy.
Sondaı-aq, eger siz jolda qalsańyz jáne qońyraý shalý múmkindigi bolsa, 1403 nómiri boıynsha táýlik boıy jumys isteıtin call-ortalyqqa habarlasa alatynyńyzdy eske salamyz.
