Elimizde 240 myńnan astam adam onkologııa boıynsha esepte tur
PETROPAVL. KAZINFORM - Qaterli isiktiń taralýynan sút bezi obyry birinshi tur, odan ári kolorektaldy obyr, ókpe, asqazan jáne jatyr moıny obyry keledi.
QR Densaýlyq saqtaý mınıstrliginiń málimetinshe, onkologııalyq aýrýlardyń taralýy boıynsha Soltústik Qazaqstan oblysy, Qaraǵandy jáne Shyǵys Qazaqstan oblystary alda. Bul óńirlerde syrqattanýshylyqtyń joǵary bolýy kóbine ekologııamen baılanysty, sonyń ishinde kóptegen iri ónerkásip kásiporyndarynyń jumys isteýinen, aýanyń, sýdyń jáne topyraqtyń aýyr metaldarmen lastanýynan bolýy múmkin. Sondaı-aq, artyq salmaq, qozǵalystyń azdyǵy, temekini, alkogoldi, janýarlar maıyn kóp tutyný onkologııalyq aýrýlarǵa shaldyǵýa ákeletin faktorlardyń biri.
- Osy jyldyń jeti aıynda ǵana 24,5 myń adamǵa alǵash ret dıagnoz qoıyldy. Jalpy el boıynsha syrqattanýshylyqtyń tirkelýi 513 jaǵdaıǵa tómendep otyr. Qaterli isikten bolatyn ólim kórsetkishinde birinshi orynda ókpe obyry, odan ári asqazan obyry, kolorektaldy obyr jáne sút beziniń obyry keledi, - deıdi mınıstrliktiń Medıtsınalyq kómekti uıymdastyrý departamenti dırektory Gúlnara Sársenbaeva.
Mamannyń aıtýynsha, turǵyndar bekitilgen qaǵıdalarǵa sáıkes jas erekshelikterine qaraı skrınıngtik zerttep-qaraýlardan óte alady. Onkologııalyq aýrýlardyń aldyn alý maqsatynda elimizde sút bezi obyryn, jatyr moıny obyryn jáne kolorektaldy obyrdy erte anyqtaýǵa arnalǵan skrınıngtik zerttep-qaraý júrgiziledi.
- Buryn qaterli isikti erte anyqtaýǵa arnalǵan skrınıngtik tekserýler tek mindetti áleýmettik medıtsınalyq saqtandyrý júıesine kiretin adamdarǵa ǵana tegin bolatyn. Al endi, bıylǵy jyldan bastap, Qazaqstan Respýblıkasynyń «Halyq densaýlyǵy jáne densaýlyq saqtaý júıesi týraly» Kodeksine engizilgen ózgeristerge sáıkes, onkoskrınıngter, mysaly, sút bezi, jatyr moıny, toq ishek obyryna arnalǵan tekserýler saqtandyrylmaǵan azamattar úshin de tegin bolyp otyr. Osynyń arqasynda skrınıngten ótetin adamdardyń úlesi 70%-dan 90%-ǵa deıin ósedi, - deıdi Gúlnara Sársenbaeva.
Buǵan deıin SQO-da jarty jylda 900 adamǵa onkologııa dıagnozy qoıylǵanyn jazǵan edik.