Elimizde 228 myńnan astam bala sporttyq úıirmelerge tegin qatysady

ASTANA. KAZINFORM — Elimizde 2021 jyldan beri memlekettik sporttyq tapsyrys baǵdarlamasy júzege asyrylyp keledi. Qazir joba aıasynda mektep jasyndaǵy 228 myńnan astam bala 7 myńnan asa sporttyq sektsııaǵa tegin qatysyp júr. Bul týraly Týrızm jáne sport mınıstrligi Kazinform agenttiginiń resmı saýalyna bergen jaýabynda málimdedi.

Memlekettik sporttyq tapsyrys – balalardyń sportqa qyzyǵýshylyǵyn arttyryp, qabiletin damytýǵa baǵyttalǵan joba. Baǵdarlama jan basyna qarjylandyrý qaǵıdaty boıynsha jumys isteıdi. Basty artyqshylyq balalar sporttyq úıirmelerge aqysyz qatysady. Osy maqsatqa jergilikti bıýdjetten 50 mıllıard teńge bólingen.

Al Damubala.kz platformasy – bul júıede balalardy tirkeıtin aqparattyq baza. Platforma arqyly 4 pen 17 jas aralyǵyndaǵy balalarǵa vaýcher beriledi. Sol vaýcher negizinde sporttyq sektsııalar men shyǵarmashylyq úıirmeler memleket esebinen qarjylandyrylady.

Mınıstrliktiń málimetinshe, «Damubala» — baǵdarlamanyń ózi emes, tek tirkeý júrgizetin tsıfrlyq júıe. Kópshilik ony memlekettik baǵdarlama dep qate túsinip jatady. Ata-analar osy platforma arqyly balasyn qalaǵan sporttyq úıirmege jazyp, kezekke qoıady.

- Júıedegi memlekettik sporttyq tapsyrys óńirlerde jergilikti atqarýshy organdar nemese olardyń ýákiletti bólimsheleri (operator) arqyly júzege asyrylady. Al sporttyq qyzmet kórsetýshi retinde bilim berý uıymdarymen qatar, jeke sport klýbtary, zańdy tulǵalar men jeke kásipkerler de qatysa alady. Operatorlar memlekettik tapsyrysty jylǵa bólingen bıýdjet kólemine qaraı qyzmet kórsetýshiler arasynda bóledi. Al bekitilgen qarjylandyrý jospary qabyldanǵannan keıin bes jumys kúni ishinde resmı saıtta jarııalanady, - delingen mınıstrlik jaýabynda.

Qarjylandyrýdyń jan basyna shaqqandaǵy tártibi 2021 jylǵy 27 sáýirde bekitilgen arnaıy ádisteme arqyly retteledi.

Aıta keteıik, Aqtóbede qysqy demalysta oqýshylarǵa úıirmeler uıymdastyrylady.