Elimizde 22 myńnan astam sý nysany tsıfrlandyryldy
ASTANA. KAZINFORM – Elimizde Sý resýrstarynyń ulttyq aqparattyq júıesi ázirlenip jatyr. Búginde oǵan 22 myńnan astam sý nysany engizilgen. Bul týraly Óńirlik ekologııalyq forým barysynda belgili boldy.
Sý resýrstary jáne ırrıgatsııa mınıstrliginiń Jerasty sýlary departamenti Jerasty sýlarynyń memlekettik monıtorıngi jáne sýarmaly jerlerdiń melıoratıvtik jaǵdaıy basqarmasynyń basshysy Lıazzat Zııabekovanyń aıtýynsha, bul júıe jerústi jáne jerasty sýlary, gıdrotehnıkalyq qurylystar men sý paıdalaný týraly derekterdi biriktirýge arnalǵan.
Qazirgi júıede ózender, kólder jáne gıdrotehnıkalyq qurylystardy qosa alǵanda, 22 myńnan astam sý nysany esepke alynǵan.
— Osy jyldyń sońyna deıin negizgi ınfraqurylymdy, onyń ishinde kanaldardy tolyq qamtý josparlanyp otyr. Osy júıe negizinde eldiń biryńǵaı sý balansy qalyptastyrylady. Bul – naqty aǵyn kólemin, sý qoımalaryndaǵy sýdyń jınalýyn jáne onyń ekonomıka salalary boıynsha tutynylýyn salystyrýǵa múmkindik beretin sapalyq jańa deńgeı, - dep atap ótti basqarma basshysy.
Buǵan deıin elimizde sý únemdeý tehnologııalary qandaı nátıje bergenin jazǵan edik.
