Elimizde 22 myńnan astam kásiporyn men uıymnyń energııa tutynýy baqylanady
ASTANA. KAZINFORM – Qazaqstanda energııa resýrstaryn kóp tutynatyn kásiporyndarǵa qoıylatyn talaptardy kúsheıtý kózdelip otyr. Bul týraly QR Ónerkásip jáne qurylys mınıstrligi Ónerkásip komıteti tóraǵasynyń orynbasary Oljas Álibekov aıtty.
Onyń aıtýynsha, qazir Memlekettik energetıkalyq tizilimge 22 myńnan astam kásiporyn men uıym engizilgen. Onyń ishinde jylyna 50 myń tonna jáne odan da kóp shartty otyn kóleminde energııa tutynatyn iri kásiporyndarǵa erekshe nazar aýdarylady. Olar úshin energııa tıimdiliginiń belgili kórsetkishteri naqtylanǵan.
– Memlekettik baqylaý kezinde tizilim sýbektileri usynatyn derekterdiń durystyǵyna, energııa tutyný normatıvteriniń saqtalýyna, mindetti energııa aýdıtiniń júrgizilýine jáne energııa tıimdiligi boıynsha belgilengen kórsetkishterdiń oryndalýyna basa mán beriledi, - dedi Oljas Álibekov Ortalyq kommýnıkatsııalar qyzmetinde ótken brıfıngte.
Onyń sózinshe, baqylaý kásiporynǵa barý arqyly da, qashyqtan da júrgiziledi. Qolda bar derekterdi taldaý barysynda talaptardyń buzylǵany anyqtalsa, kásiporynǵa tıisti usynym beriledi. Al ol oryndalmaǵan jaǵdaıda nysanǵa baryp profılaktıkalyq baqylaý júrgizý qarastyrylǵan.
Sonymen qatar ol qazir energııany únemdeý jáne energııa tıimdiligin arttyrý salasyndaǵy zańnamany jetildirýge baǵyttalǵan eki zań jobasy qaralyp jatqanyn atap ótti.
– Usynylǵan ózgeristerdiń biri energııa tıimdiligi talaptaryn buzǵany úshin ákimshilik jaýapkershilikti kúsheıtýdi kózdeıdi. Sondaı-aq Memlekettik energetıkalyq tizilimdi qalyptastyrý jáne júrgizý tártibin jetildirý, energııa servıstik naryǵyn damytý jáne energııa tıimdi jobalarǵa bıznesti keńinen tartý usynylyp otyr, - dedi komıtet tóraǵasynyń orynbasary.
Oljas Álibekovtiń málimetinshe, Qazaqstandaǵy energııany eń kóp tutynatyn 106 kásiporynnyń 53-i ónerkásip salasyna tıesili. Onyń 30-y óńdeý ónerkásibinde, 23-i taý-ken metallýrgııa kesheninde jumys isteıdi.
Aıta keteıik, buǵan deıin Almaty qalasy men oblysta elektr energııasynyń baǵasy ósetini habarlandy.
