Elimizde 208 pedagog mektep dırektorlyǵyna konkýrssyz ótedi
ASTANA. KAZINFORM — Búgin elordada Memleket basshysynyń tapsyrmasyna sáıkes, jastar kadrlyq rezervi úlgisindegi «Bilim berýdegi ózgeristiń 1000 kóshbasshysy» jobasyn sátti aıaqtaǵan pedagogterge Oqý-aǵartý mınıstri Ǵanı Beısembaev sertıfıkat tabystady.
Bul irikteý men biliktilik kýrsynan ótkenderge eshbir konkýrstyq rásimsiz birden birinshi basshynyń bos ornyna taǵaıyndalýǵa múmkindik beredi.
— Bul — otandyq bilim júıesin damytýdyń jańa kezeńi. Segiz aıdyń ishinde sizder irikteýden ótip, jeke, kásibı, basqarýshylyq, analıtıkalyq daǵdylar men quzyretterińizdi damyttyńyzdar. Endi Sizder naǵyz kóshbasshylar retinde elimizdegi bilim berý júıesiniń sapasyn arttyrýǵa óz úlesterińizdi qosýlaryńyz kerek. Eń bastysy — balalarymyz ben pedagogterimizge jaıly jáne qaýipsiz orta qalyptastyrý, — dedi mınıstr.
Aıta keteıik, Oqý-aǵartý mınıstrliginiń tapsyrmasyn iske asyrý, úmitkerlerdi irikteý men olardyń biliktiligin arttyrý sharalaryn Nazarbaev zııatkerlik mektepteri derbes bilim berý uıymynyń pedagogıkalyq sheberlik ortalyǵy ótkizgen.
Ortalyq kóshbasshylardy bes kezeń boıynsha iriktegen.
Alǵashqy kezeńde úmitkerler óz quzyrettiligin baǵalaý úshin testileýden ótse, ekinshi kezeńde oqýǵa jiberiledi.
Munan soń elimizdiń aldyńǵy qatarly mektepterinde taǵylymdamadan ótedi, tórtinshi kezeńde qorytyndy baǵalaý rásimi júrgizilip, besinshi kezeńde mınıstrlik janyndaǵy komıssııamen áńgimelesýden ótedi.
Bul mektep basshylarynyń respýblıkalyq kadr rezervin qurý úshin jasalyp otyr.
— Baǵdarlama halyqaralyq ozyq tájirıbelerdi eskere otyryp iske asyryldy, al testileý sharalary jetekshi tájirıbelerge negizdelgen. Bastapqy kezeńde jobaǵa qatysýǵa 8068 adam tirkelip, onyń 2809-y testileýden ótti. Testileý nátıjeleri boıynsha oqýǵa usynylǵan úmitkerlerdiń saralanǵan tizimi qalyptastyryldy. Pedagogıkalyq sheberlik ortalyǵy byltyrǵy shildeden bastap bazalyq deńgeıde 500-ge tarta úmitkerdi oqytty. Alaıda barlyq kezeńnen súrinbeı ótken 208 pedagog qana joba sertıfıkatyna ıe bolyp, rezervke endi, — dedi «Nazarbaev zııatkerlik mektepteri» DBBU basqarma tóraǵasy Ánýar Janǵozın.
Sondaı-aq top-menedjerler zamanaýı mekteptegi tendentsııalar, muǵalimniń úzdiksiz damýy men kásibı ál-aýqaty, balaǵa qolaıly orta qurý, strategııalyq josparlaý, tabysty dırektor retindegi bedel, kásibı ekologııa, analıtıkalyq quzyretter syndy taqyryptardy tereńirek zerttedi.
«Nazarbaev zııatkerlik mektepteri» DBBU kýrstan keıin de qatysýshylardy súıemeldeý, bolashaq basshylardyń kásibı damýynyń júıeli monıtorıngin jasaıdy.
Elimizdegi mektepterdiń bilim sapasyn arttyryp, deńgeıin kóterýge baǵyttalǵan joba bıyl da jalǵasyn tabady.
