Elimizde 2035 jylǵa deıin 26 GVt kólemindegi jańa qýat kózderi iske qosylady
TAShKENT. KAZINFORM – Qazaqstan 2035 jylǵa deıin 26 gıgavatt (GVt) kólemindegi jańa qýat kózderin iske qosýdy josparlap otyr. Bul týraly Tashkentte ótip jatqan «Uzbekistan Energy Forum» forýmyna qatysqan QR Energetıka vıtse-mınıstri Baqytjan Іlııas aıtty, dep habarlaıdy Kazinform agenttiginiń Tashkenttegi menshikti tilshisi.
- Qazaqstan 2060 jylǵa qaraı kómirtegi beıtaraptyǵyna qol jetkizýdi kózdep otyr. Bul strategııaǵa sáıkes, 2035 jylǵa deıin kólemi 26 GVt bolatyn jańa qýat kózderin iske qosýdy josparlap otyrmyz. Onyń 5,5 GVt-y qoldanystaǵy elektr stantsııalaryn jańǵyrtý esebinen júzege asady. Al qalǵany taza energııamen jumys isteıtin jańa generatsııanyń úlesine tıesili, - dedi forýmda sóz sóılegen vıtse-mınıstr.
Ol atap ótkendeı, 2035 jylǵa qaraı el jańartylatyn energııa kózderiniń úlesin 25%-ǵa jetkizýge nıetti. Sondaı-aq, aldaǵy ýaqytta kún, jel jáne sý stantsııalarynan qosymsha 8 GVt qýat alý josparlanyp otyr.
- Elektr jáne jylý jelilerin jetildirý jumysy da nazardan tys qalmaıdy. Elde 2029 jylǵa deıin energetıka sektoryn jańǵyrtýǵa arnalǵan aýqymdy ulttyq joba júzege asyrylyp jatyr. Onyń sheńberinde júzdegen shaqyrym jańa jeli salynyp, qoldanystaǵylary jóndeýden ótedi, - deıdi Baqytjan Іlııas.
Vıtse-mınıstrdiń sózinshe, Qazaqstan balamaly energııa kózderin damytýǵa da erekshe kóńil bólip keledi. Atap aıtqanda, elde sýtegi energetıkasyn damytýdyń uzaq merzimdi tujyrymdamasy bekitildi.
- Biz bul salaǵa asa joǵary jaýapkershilikpen qaraımyz. Osyǵan baılanysty qazirgi tańda normatıvtik-quqyqtyq bazany ázirleý jáne «jasyl» sýtegini qoldanýǵa bolatyn kásiporyndarda pılottyq jobalardy iske asyrý múmkindigi qaralyp jatyr, - dep málim etti ol.
Munymen birge búginde data-ortalyqtarǵa degen suranys artyp keledi. Bul rette ınvestorlar olardyń ekologııalyq taza jolmen óndirilgen elektr energııasymen jumys istegenin qalaıdy. Osyǵan baılanysty Qazaqstan bul usynystar men múmkindikterdi saralaýǵa kirisken.
- Biz kórshiles memlekettermen tıimdi yntymaqtastyq ornatyp jatyrmyz, tıisinshe Ortalyq Azııa men TMD elderindegi áriptesterimizben tájirıbe almasýǵa árdaıym daıynbyz, - dep túıindedi vıtse-mınıstr Baqytjan Іlııas.
Eske salaıyq, Qazaqstan Qyrǵyzstanǵa 2025-2026 jyldary 1,56 mlrd kVt/saǵat elektr energııasyn jetkizdi.
Sondaı-aq, taıaýda Astanada ótken Óńirlik ekologııalyq sammıt aıasynda Energetıka mınıstrligi men «Karaganda Wind Power» kompanııasy arasynda 500 MVt jel elektr stantsııasyn salý jóninde ınvestıtsııalyq kelisim jasaldy.
