Elimizde 2030 jylǵa deıin 660 megavattyq jańa cý elektr stantsııalary iske qosylady
ASTANA. KAZINFORM - Qazaqstan gıdroenergetıka salasyn kezeń-kezeńimen keńeıtip keledi. Qazirgi ýaqytta respýblıka boıynsha jalpy belgilengen qýaty 313 MVt bolatyn 43 gıdroenergetıka nysany jumys isteıdi.
QR Energetıka mınıstrligi baspasóz qyzmetiniń habarlaýynsha, 2025 jyly júzege asqan jobalar qatary Jetisý oblysyndaǵy jańa stansamen tolyqty. Qýaty 26 MVt «Korın CES-2» nysany paıdalanýǵa berildi. 2025 jyldyń qorytyndysy boıynsha jańartylatyn energııa kózderi nysandarynan óndirilgen elektr energııasynyń kólemi 8,621 mlrd kVt.saǵ boldy. Onyń ishinde qoldanystaǵy shaǵyn jáne orta sý elektr stansalary 1,196 mlrd kVt.saǵ ekologııalyq taza energııa óndirdi.
Jasalǵan kelisimsharttarǵa sáıkes, 2030 jyldyń sońyna deıin jalpy qýaty shamamen 660 MVt bolatyn jańa sý elektr stansalaryn iske qosý josparlanyp otyr. Saladaǵy ashyqtyqty qamtamasyz etý jáne ınvestıtsııa tartý maqsatynda Energetıka mınıstrligi aýktsıondyq saýda-sattyq mehanızmderin belsendi qoldanyp jatyr.
Atap aıtqanda, 2025 jyly gıdroenergetıka jobalary úshin 500 MVt qýat aýktsıonǵa shyǵaryldy. Qoldanystaǵy JEK nysandarynyń, sonyń ishinde sý elektr stansalarynyń eń joǵary shoǵyrlanýy eldiń ońtústik jáne shyǵys óńirlerinde baıqalady. Kóshbasshy aımaqtar qatarynda Jambyl, Almaty jáne Jetisý oblysy bar.
- Josparlanǵan SES jobalaryn iske asyrý Qazaqstannyń energetıkalyq teńgerimin ártaraptandyrýǵa múmkindik beredi. Sonymen qatar, ózenderdiń tabıǵı sý áleýetin tıimdi paıdalaný arqyly shalǵaı óńirlerdi turaqty «jasyl» energııamen qamtamasyz etýge jaǵdaı jasaıdy, - delingen habarlamada.
Aıta keteıik, bıyl elimizdiń sý-energetıka resýrstarynyń kartasy ázirlenedi.