Elimizde 2029 jylǵa qaraı polıetılen men býtadıen óndirisi iske qosylady
ASTANA. KAZINFORM — Qazaqstanda 2029 jylǵa qaraı iri munaı-gaz hımııasy jobalaryn iske qosý josparlanyp otyr. Olardyń qatarynda polıetılen, býtadıen jáne karbamıd óndiretin kásiporyndar bar
Bul týraly Astanada ótken «Ortalyq Azııa men Kaspıı óńiriniń munaı-gaz hımııasy jáne munaı óńdeýi» atty 13-shi bıznes sammıt aıasyndaǵy plenarlyq sessııada aıtyldy.
Energetıka mınıstrliginiń Munaı-gaz hımııasy departamentiniń dırektory Temirlan Úrkimbaevtyń aıtýynsha, munaı-gaz hımııasy — óńdeýshi ónerkásipti damytýdyń perspektıvaly baǵyttarynyń biri.
Salany damytý maqsatynda Energetıka mınıstrligi 2024 jylǵy qazanda 2024–2030 jyldarǵa arnalǵan munaı-gaz hımııasy ónerkásibin damytý jónindegi jol kartasyn bekitken. Qujat alty negizgi baǵyt pen 34 is-sharany qamtıdy.
Jol kartasy aıasynda jalpy ınvestıtsııa kólemi shamamen 12 mlrd dollar bolatyn bes iri jobany iske asyrý kózdelgen. Olardyń júzege asýy nátıjesinde 20 myńǵa deıin turaqty jáne ýaqytsha jumys orny ashylady dep kútilýde.
Sonymen qatar shıkizatty ishki tutyný kólemin ulǵaıtyp, óndiris pen eksporttyq áleýetti arttyrý josparlanyp otyr.
Polıetılen zaýyty 2029 jyly iske qosylady
Qazaqstanda jylyna 1,25 mln tonna polıetılen óndiretin zaýyttyń qurylysy júrip jatyr. Kásiporyndy 2029 jyly paıdalanýǵa berý josparlanǵan.
Oǵan qajetti shıkizatty qamtamasyz etý úshin gaz separatsııalaý kesheni de salynyp jatyr. Onyń qurylysy da 2029 jyly aıaqtalýǵa tıis.
Budan bólek, elimizde jylyna 339 myń tonnaǵa deıin býtadıen jáne 880 myń tonna karbamıd óndiretin jobalar júzege asyrylyp jatyr.
Qazirdiń ózinde Qazaqstanda jylyna 500 myń tonna polıpropılen óndirýge qaýqarly «Kazakhstan Petrochemical Industries» kásiporny jumys isteıdi. 2025 jyly zaýyt 375 myń tonna ónim óndirgen.
Mınıstrlik munaı-gaz hımııasy salasynda shıkizatty óndirýden bastap, bazalyq munaı-hımııa ónimderin shyǵarýǵa jáne olardy odan ári óńdeýge deıingi tolyq óndiristik tizbek qalyptasyp kele jatqanyn atap ótti.
Eske salaıyq, buǵan deıin Túrkistanda polıetılen qaptama ónimderin jáne skotch óndiretin zaýyt ashylǵanyn habarlaǵan edik.
