Elimizde jylyjaı sany 10%-ǵa ósti
ASTANA. KAZINFORM – 2026 jylǵy 1 qańtar jaǵdaıy boıynsha Qazaqstan Respýblıkasynda 2 319 jylyjaı tirkelgen. Bul ótken jylmen salystyrǵanda 10%-ǵa kóp. Jylyjaılardyń jalpy aýdany 12,1 myń sharshy metrdi quraıdy. Bul týraly Ulttyq statıstıka bıýrosynyń baspasóz qyzmeti habarlady.
Kóbinese jylyjaılar kókónis daqyldaryn ósirýge arnalǵan – 2 159 birlik, ıaǵnı jalpy sanynyń 93,1%-y. Basqa maqsattaǵy jylyjaılar 160 birlikti quraıdy:
- gúl ósirýge arnalǵan – 47 birlik (2,0%);
- sańyraýqulaq ósirýge arnalǵan – 6 birlik (0,3%);
- basqa maqsattaǵy – 107 birlik (4,6%).
Aýdan boıynsha 10 000 sharshy metrge deıingi jylyjaılar basym, olar jalpy sanynyń 90,9%-yn quraıdy. 10 001–50 000 sharshy metrge deıingi jylyjaılar – 8,1%, al 50 001 sharshy metrden asatyndary – 1,0%.
Jylyjaılardyń jalpy sany boıynsha 5 000 sharshy metrden asatyn óndiristik jylyjaılar – 23,5%, al 5 000 sharshy metrge deıingi fermerlik jylyjaılar – 76,5%. Óndiristik jylyjaılar negizinen Túrkistan, Almaty oblystarynda jáne Shymkent qalasynda shoǵyrlanǵan jáne ónimdiligi joǵary.
Jylyjaılardyń 66,3% 10 jyldan az, 30,3% 11–20 jyl, al 3,4% 21 jyldan astam paıdalanylady.
Eń kóp jylyjaı Túrkistan oblysynda shoǵyrlanǵan – jalpy sanynyń 62,4%-y. Bul aımaq jalpy paıdalanylatyn jylyjaı aýdanynyń 75,3%-yn jáne jınalǵan ónimniń 49,2%-yn beredi.
2025 jyly jylyjaılarda jınalǵan kókónis óniminiń jalpy kólemi 168,7 myń tonnany qurady, bul 2024 jylmen salystyrǵanda 1,1% kóp. Ónimniń ósýi qııar daqyldarynyń egis kóleminiń ulǵaıýy jáne 2025 jyldyń II toqsanynda jylyjaı alańdarynyń keńeıýimen baılanysty.
Jalpy ónim kólemine Túrkistan, Almaty, Aqtóbe, Pavlodar oblystary men Shymkent qalasy negizgi úles qosty.
Qyzanaq pen qııardan basqa, jylyjaı sharýashylyqtarynda banan, lımon, qulpynaı, kókjıdek sııaqty kópjyldyq daqyldar, sondaı-aq qarbyz, tátti qaýyn sııaqty baqsha daqyldary ósiriledi.
Qııar ósiriletin jylyjaılardyń kóshbasshylary – Túrkistan oblysy, Shymkent qalasy, Almaty jáne Pavlodar oblystary. Qyzanaq ósirý boıynsha kóshbasshylar – Túrkistan, Aqtóbe, Almaty jáne Pavlodar oblystary.
Eske sala keteıik, budan buryn Túrkistan oblysynda elimizdegi eń iri ónerkásiptik jylyjaı kesheni iske qosylǵanyn habarlaǵanbyz.