Elimizde 2026 jylǵy qańtar-maýsym aılarynda JІÓ 4,1% ósti
ASTANA. KAZINFORM — 2026 jylǵy qańtar-maýsym aılarynda Qazaqstanda jalpy ishki ónim (JІÓ) kólemi jedel derekter boıynsha 70,95 trln teńge boldy.
Ulttyq statıstıka bıýrosynyń málimetine qaraǵanda, naqty mánde JІÓ byltyrǵy osy kezeńmen salystyrǵanda 4,1% ósti.
Eń joǵary ósim qurylys salasynda tirkeldi. Bul baǵyttaǵy ósim — 15,2%. Odan keıin óńdeý ónerkásibi — 9,8%, kólik jáne qoımalaý — 7,1%, kóterme jáne bólshek saýda, avtomobılder men mototsıklderdi jóndeý — 5,7%, aýyl, orman jáne balyq sharýashylyǵy — 4,4% boldy.
Jyldyń alǵashqy alty aıynda JІÓ qurylymynda taýar óndirýdiń úlesi 36,4%, al qyzmet kórsetý salasynyń úlesi 55,4% boldy. Ekonomıkadaǵy eń úlken úles ónerkásipke tıesili — 28,6%.
JІÓ ósimine eń kóp úlesti óńdeý ónerkásibi qosty — 1,25 paıyzdyq tarmaq. Kóterme jáne bólshek saýdanyń úlesi 0,93 paıyzdyq tarmaq, al qurylys salasynyń úlesi 0,79 paıyzdyq tarmaq boldy.
Eske salaıyq, buǵan deıin Qazaqstannyń JІÓ kólemi 2026 jylǵy alǵashqy úsh aıda 34,1 trln teńge bolǵanyn habarlaǵan edik.
